Shillong 25 Rymphang: U bah Bindo M Lanong u badei u wei u nongialam ba la rangbah bha ha ka sain hima sima u la ong, ba ka jingwan ka seng sain hima ba thymmai hapoh ka KHADC kalong ka ba sngewtynnad namar ba ki paidbah ki jied bad shaniah ia Kane ka seng ba kidon ki nongrim treikam ka ba lah ban ai jingkylla ha ka synshar ka khadar bad ki paidbah mynta ka kynti ki pdiang ia ka seng VPP.
U bah Bindo u la ong, ba ka jingphai khmat ki paidbah sha ka seng ba thymmai namar ba kidon ki nongialam ki nongtrei ha ka party ki ba dang thymmai ki bym don kidak ban pynthohbria. Ia Kane u bah Bindo Lanong u la pynpaw haba ia kren bad h Rupang mynta ka sngi baar ka 25 Tarik Rymphang 2025.
Kum u riew rangbah u la kyntu ia Kane ka seng thymmai ka ban sathaw ia ka EC hapoh ka KHADC ba kidei ban shakri hok bad ban kyntaid ia ka jingmlien bamsap bad ba kidei ban synshar da kaba khuit kumba ka nongrim ka nongrim ba ka party ka la khlei bad kumba ki paidbah ki angnud bad khmih lynti ia ka synshar ka khadar ka ba khuit na suba.
Haba kylli ia ka jingjop ka khun jong u ka kong Deity Majaw na Malki-Laitumkhrah konstitwensi U bah Bindo Ula ong, ba u kyrshan ia la kajong ka khun ba ka ia aireng ha Kane ka ilekshon MDC, hynrei u khlem mih ban leit sha ki rynsan ialap ilekshon.
U la pynpaw ba ka jingjop ka khun jongu kadei beit halor ka nongrim ba ki paidbah ki ai ka jingkyrshan.
Ha Kane ka seng VPP kidon ki nongialam ki ba paw lypa kum u bah Ardent uba la bat teng kum u CEM ka KHADC bad u MLA, nalor kata sa u MP jong ka Lok Sabha u Dr.Ricky AJ Syngkon bad ki katto kattne ngut ki dkhot ki ba donlang. Kane ka kynhun thymmai jongki kaba ki la shim ruh ia ka symbol ha u “Prah” ,ha kaba u la khring bha ia ki paidbah nongrep bad ym tang ia ki nongrep, hynrei ha iing ki donkam ia u Prah ban peh ia u Skop, ban peh ia u kba, la ong u bah Bindo.
Kumta kane ruh kadei kawei ka ba la pynkhring ia ki paidbah ban ai ka jingkyrshan ia ka VPP bad khamtam ruh ba ka dangdei ka party ka ba dang thymmai.
U bah Bindo u la khmih lynti ruh, ba kine ki nongialam jong ka VPP ba kin bad ha ka nongrim lajong bad ban long kita ki nongpyniaid ban tei ia ka imlang ka sahlang ban tei ia ka Jylla.
U la ong ruh,ba ki kyrtong bajop na Kane ka party ki dei ki ba dang thymmai, bad kidon ki bym pat tip eiei bad kidon pat ki ba la nang ha kaba iadei bad ka ilekshon, da kaba u ong,ba la khun jongu ka bajop nyngkong na ka party VPP kadei ka ba la tipbha namar ka la iohi lut ia ka jingiaid lynti jongu naduh kapor ba ka dangrit, namar u la long teng u MLA, MDC, u CEM, u speaker bad ka la tip lut kumno ka iaid ka ilekshon bad ka khamsuk ia i.
“Don bun kiei kiei ki ba kongsan hapoh ka District Council bad kata kalong,ba kin pynneh pynsah ia ka nongrim ba lah don lypa, ka ba kongsan eh kalong, ba kumno ban pynneh pynsah ia ka Riti ka Dustur”, ong u bah Bindo.
Shuh shuh u la ong,ba ka jingwan rung ki briew ba nabar Jylla bad nabar ri sha ka Jylla ka la kylli, bad u la kyntu ba ka EC ka ban sa thaw thymmai ha KHADC kan peitbha ia Kane.
Nalor kata u ong, badei ban peit bha ia ka khyndew ka shyiap, ia ka khaii ka pateng bad kane la trading by non-tribal kadei kawei pat, ha kaba kin hap ban iada ia ki briew barit jong ngi ki nongkhaii barit ha kylleng ka Jylla. Bad ka ba kongsan eh kalong ba kidei ban khyrkhing bha ia ka jingkhaii jong ki mynder namar Kane kadei hadon ka District Council ym ha ka State Government, ha kaba kim dei ban ai kular ki licence sha ki mynder.
Phi don ban ong eiei?