Sa ha shkor U Rajnath, pynsawa VAB ki Rangbah Shnong

Shillong, 4 Nohprah:
Hynnin ka sngi, ki nongialam jong ka Synjuk Ki Nongsynshar Shnong Ka Bri U Hynniewtrep, ki la ia kynduh ia U Kiren Rijiju myntri khynnah ka tnat poh iing jong ka sorkar India bad mynta ka sngi pat, kitei ki nongialam, ba kynthup ia U Dr W Khar shiing President, Bah RL Blah General Secretary bad kiwei pat ki dkhot, ba kynthup ia U bah Emlang Lytan, Bah E G Kharbani, Bah G G Laloo, Bah S S Langi, Bah ELNongrang, Bah Rangsan Sohmat, ha ryngkat U bah VGK Kynta Sr Advocate, Bah E K Sutnga Advocate bad U Bah Kynpham Khar lyngdoh Advocate, ki la ia kynduh mynta ka sngi, ia U Rajnath Singh myntri kam poh iing ha ryngkat bad kiwei de ki heh sorkar jong ka tnat kam poh iing, ba kynthup ia U Satyen dra Garg Joint Secretary, ka tnat kam poh iing ba dei peit ia ka thain shatei lam mihngi, ha kaba ki dawa, ban ioh noh ia ka jingmynjur jong U Lat ka Jylla, ia ka Village Administration Bill. U Ma Vincent H Pala MP na ka Jylla ruh, u don lang bad katei ka kynhun.
La iathuh ba ia ka VAB, kaba dei na bynta ka Jaintia Hills, wat la ym shym la phah sha ka tnat kam poh iing jong ka sorkar India, hynrei, la iakren lang, namar ba ia katei ruh U Lat, um pat shym la mynjur satia. U myntri kam poh iing, ula shah shkor ia ka jingkren jong ki nongialam ka Synjuk bad u pynthikna ba ia katei ka kam, yn leh noh kumba dei ban leh.
La sngewthuh ba ka tnat kam poh iing, ka la nang iaid shakhmat ia ka kam bad ka dang wad jingmut mynta na ka tnat ain bad la iathuh ba ki nongialam jong ka Synjuk, ki la rai ba kin iaid shakhmat ia ka kam, haduh ba ka jingdawa jongki, kan urlong, kumba la mynjur da ki District Council.