Shillong 25 Rymphang: U MLA ka Nongpoh constituency , u ba dei na ka United Democratic Party (UDP) u bah Mayralborn Syiem, u la ong ba ka jingjop bun ka Voice of People Party (VPP) ha ka Khasi Hill Autonomous District Council (KHADC) ka dei namar ba kane ka party ka dang thymmai bad ki paidbah ki kwah ban ailad ia ka khnang ba kin ioh ban bishar ia ki kam jong ki Kum ba ki la kular.
Haba kren sha ki ladpathai khubor u bah Syiem u la ong , ba kum u MLA Jong ka UDP , u ai khublei ia ki paidbah kiba la mih ban ai la ka jong ka vote ha ka MDC election , bad ka jingjop jingrem hapoh ka Shynshar Paidbah ka don beit bad ka UDP ka pdiang da ka jingsngewrit , halor ka jingshah rem ha Nongpoh Constituency hadien ba u bah Balajied Ranee um shem la poi sha ka thong ka jingjop wat la ngi la pyrshang ban trei shitom .
U la ong ba “Ka jingbym jied biang ki paidbah ia u kyrtong ka UDP ha Nongpoh Constituency ka lah ban long namar ba ki paidbah ki la kwah ka jingkylla lane ka lah ban don ka jingduna na ka liang jong ka party ,ha kaba ki paidbah kim kwah shuh ban kyrshan ia u MDC na ka UDP “.
U la bynrap ba ” kane ka long Kum ka sienjam ba ka party kan dang lah ban kham pynbha shuh shuh ia ki jingtrei kam Jong ka ha ki por ki ban wan , hynrei na ka liang jong nga, nga kitbok kitrwiang ia baroh ki ba la jop na Ribhoi District ba kin lah ban trei kumba u paidbah u la khmied lynti ia ki ban trei bad lyngba ki ain ba pher bapher ban dang pynkhlain shuhshuh bad ruh ki ain kiba thymmai bad ka jingdon ka 6 th schedule ban pynkhlain ia ka khyndew k shyiap ka riti ka dustur”.
Haba kylli halor ka jingjop bun ka VPP kan ktah ia ka UDP ha ka MLA election, u la ong ba Ka MLA election ka dang don sa lai snem , bad Kum ka party kan treishitom hynrei ka ba kongsan hi ka long ba kumno ka UDP kan trei nangne shakhmat , bad ki paidbah kin sa pynshong nongrim halor ka jingtreikam jong ki nongmihkhmat bad ki sengsainpyrthei bapher bapher.
” Kino kino ki nongmihkhmat kiba trei bha hi , ngam artatien ba ki paidbah kin ai ka jingkyrshan na kapor sha ka por , namar ka bor ka dei ha ki paidbah hi” u la ong .
Haba kylli u la ong ” Kaei kaei ka ba thymmai ka dei kaba itynnad, bad ngi ju kmen haba ngi ioh kaba thymmai hynrei ka jingkiew bad ka jinghiar ki seng sainpyrthei kam dei shuh kaba thymmai, ka ju jia kumne ha ka kam sainpyrthei.Lada ngi bishar ia ka Congress ka la don ka por ba ka kiew bha bad mynta wat tang shi seat ruh kam Shem la ioh ha KHADC , kumjuh ka BJP ruh , ki seng sainpyrthei ki wan ki leit hynrei ki paidbah ki stad ban peit ia ka jingtreikam ki sengsainpyrthei katno ba kin lah ban shakri “.
“Kumta ka VPP ka dei ka party bad thymmai Mynta ha District Council ka ioh ia ka bor ban shynshar marwei , ngin kitbok kitrwiang ba kin trei bha khnang ba ki paidbah kin pynshong nongrim ia ki jingtrei Jong ki , bad ba ki paidbah kin lah ban pyrkhat la kin dang bteng ban kyrshan ne ban ym bteng shuh ban kyrshan ha ki por ban dang wan ” u la bynrap.
Phi don ban ong eiei?