Shillong 25 Rymphang: Ha ka janmiet jong ka sngi nyngkong, ka 24 tarik Rymphang 2025, ka badei ruh ka sngi pynbna ia ka Result jong ka Ilekshon MDC sha KHADC bad ha JHADC, kumba katto kattne por eiei tang mar shu kem dum, la iohi lyngba ki dur khih ne video, ba la saphriang ha ki rynsan social media, ha kaba ki paidbah ki la iashoh ia kura mar kylliang.
Katkum kawei ka durkhih ba la saphriang, ba ki paidbah ki la iashoh iadat la pyntikna, ba kadei ha surok pyrshah bad ka iingkmie jong u bah Pathaw u kyrtong khlem seng na Mawlai Konstitwensi u ba la shah rem noh ha kane ka kynti ha u kyrtong ka Voice of The People Party (VPP).
La sakhi ruh, ba sa kawei ka durkhih ka ba ym lah ban pyntikna haei ka jia, hynrei la iohi ba ki don ki kynhun ki ba la iashoh bad ia kura mar kylliang hapdeng surok.
Ym tang ha Ri lum Khasi ba mih ka jingia huri hira, hynrei la iohi ba ka ba jur tam kadei ja Jaintia Hills, ha kaba kiwei ki nongkyrshan ki ba la shahrem noh ha kane ka kynti, ki la la leit ban lynthem maw ia kawei ka iingsah ka ba kyrshan radbah ia u kyrtong bajop, ha kaba katkum ki durkhih la iohi, ba katei ka iing ka la pait la pra lut ki jingkhangïit bad ha phyllaw ruh la dap satang da ki ïit ba la pait bad ki maw ki na kawang ia katei ka iing.
Kum ban shu kdew hangne, ba ka jingmih ka jingia huri hura ha surok bad iashoh, kadei beit ka jingbuaid Ilekshon, namar don lehse ki nongkyrshan ki ba bitar ba u kyrtong ba ki kyrshan u rem noh bad ruh lah ban don ka jingshah beiñ shah khoh ha ki nongkyrshan bajop ia ki na rem.
Shuh shuh la ioh jingtip, ba hynnin ka miet hadien na la jia katei ka jingiashoh, ki bor pulit ki la leit mar mar sha Mawlai ban tehlakam, hynrei kat ban da poi ki pulit ka jingiashoh kam don shuh.
Watla katta ki bor pulit hynnin ka miet ha Mawlai ki la pynlong ka jingpahara ka bajur bha ha kitei ki jaka ba iashoh ia kura, kumba ka la paw ha ki durkhih.
Phi don ban ong eiei?