Ha KHADC yn sieh MDC ka sorkar

Shillong, 04 Nohprah:
U Myntri Rang bah ka jylla u Mukul Sangma u la ong ba katkum ka ain, ka kam MDC shu sieh ha Khasi Hills Autonomous District Council (KHADC) kan shong ha ka sorkar jylla katba ka rul ka iapher ha Garo Hills Autonomous District Council (GHADC ha kaba ka sorkar jylla kan hap ban shu pdiang ia ka kyrteng ba phah da ka
Executive Committee ka Council.
“Katkum ka ain, ban thung MDC ha KHADC kan shong ha ka sorkar jylla hynrei ha ka GHADC ka sorkar kan hap ban pdiang ia ka kyrteng ba phah da ka Executive Committee”, la ong u Mukul haba iakren mynta ka sngi sha ki lad pathai khubor hadien ba la wai ka jingialang ka kynhun myntri. “Ka don ka jingiapher hapdeng ka KHADC bad ka GHADC ha kaba iadei badka rukom thung ia u MDC shu sieh”, la ong u Mukul.
Haba kylli balei slem ban sieh MDC ha GHADC bad KHADC, u Mukul u la ong ba ka sorkar kam kwah ban leh kyrkieh ban shu thung hak dak hynrei kan shu leh jai jai. Kane ka jingkren jong u Myntri Rangbah ka lah ban buh diengpynkiang ia ka EC ka PDF kaba ialam da u Bah Pynshngain N Syiem kum u CEM kaba la khot kyrpang ia ka dorbar ka KHADC ha ka 14 tarik Nohprah ban pynskhem ia u kyrtong shu sieh ban phah sha ka sorkar jylla ba kan pdiang. Ka jingkren jong u Mukul ka pyni ba ka la don ka jingiapher kaba jur hapdeng u CEM Bah Pynshngain halor kane ka kam sieh MDC.Ka jingiapher ka la paw ruh haba u Bah Pynshngain um shym kwah shuh ban sieh biang ia u Bah Gabriel Wahlang kum u MDC katba na ka liang jong u Mukul u dang kwah ban sieh biang ia u hadien ba u la shah rem ha ka elekshon shiteng na Nongstoin ba dang shu dep. Kumba ka paw na ka jingkren jong u Myntri Rangbah, ka dorbar kyrpang
ka KHADC ban pynskhem ia u MDC shu sieh ka lah ban nym urlong namar ba ka sorkar kan nym pdiang ia u briew ban phah da ka KHADC hynrei kan
jied da u briew lajong.