Shillong 17 Rymphang: Ki nongialam ka Hynniewtrep Integrated Territorial Organisations ( HITO) mynta ka sngi ki la leit ban ujor ha u Chief Electoral Officer (CEO) u BDR Tiwari , halor ka jingdon ki nongkitkam ka National People Party (NPP) kiba pynbeij ia ki nongthep vote ha West Jaintia Hill , da kaba pyndonkam bakla ia ka Scheme PMAY- G .
Kat Kum ka jingiathuh u General Secretary ka HITO u bah Balajied Jyrwa u la iathuh ba ka jingwan ujor ka Seng ha u CEO ka long halor ka jingujor ki paidbah ka West Jaintia , ba ki nongkitkam ka NPP ha West Jaintia Hill kiba ialam bakla halor ka Scheme PMAY- G, da kaba ki pynbeij ba lada ki thep ia ka vote ha ki kyrtong ka NPP kin ioh ia kane ka skim .
“Ki nongkitkam ka NPP ha West Jaintia ki la leit ban kular ia ki paidbah ba lada ki thep ia ki vote ha ki kyrtong Jong ki , ka kyrteng Jong ki ba thep vote kan mih hapoh kane ka skim bad nalor kane kin hap ban leit mih ruh sha u MLA Jong ki ban ioh ia kane ka skim ” u la ong.
U la bynrap ba “Kane ka dei ka jingpynkhein ia ka Model Code of Conduct Jong ka Election Commission of India ,kumta ngi la wan ban ujor halor kane” .
U la iathuh ba ha West Jaintia Hill District , ka Seng ka la ioh ia ka jingujor na ki paidbah hi kiba la iathuh halor ka jingwan pynbeij ki nongialam ka NPP ban ioh ia ka skim lada ki thep ia ka vote sha u kyrtong ka NPP.
“Hato kane ka dei shisha ne em ba kita ki skim bad ioh lyngba ki MLA , namar ha ka jingshisha ka Skim PMAY- G kam dei ka skim sorkar Jylla hynrei ka dei ka skim Jong ka Sorkar pdeng. Kine ki skim ki don la ka jong ka rukom trei treikam ban sam hynrei hangne pat ngi ioh sngew ba ki Don na ki briew kiba pynthame ia kine ki skim ban ioh vote” u la ong .
U l bynrap ba Ka seng hi ka dawa ia ka ophis ban pynlong da ka jingtohkit halor kane ka jingujor Jong ki paidbah ka West Jaintia Hill, khang ba ki paidbah ruh kin sngewthuh ba ka jingthep vote kam don bynta eiei bad kane ka skim.
Phi don ban ong eiei?