Sngew skhem u Conrad Sangma ban jop u Bah Sohtun kum u Kyrtong ka NPP na Jirang

Nongpoh, 15 Rymphang: U Conrad K. Sangma, Myntri Rangbah ka sorkar jylla bad uba dei ruh u National President ka National People’s Party (NPP), mynta ka sngi u la leit ban ialap Ilekshon ha shnong Maikhuli bad Umpher, ha kaba katei ka jingleit jong u sha kitei ki shnong, ka long ban leit ialap Ilekshon na bynta u Bah Sosthenes Sohtun, MLA Jirang bad uba long mynta kum u Kyrtong MDC ka NPP na Jirang Constituency.

Ha ka jingialang ialap Ilekshon u Conrad Sangma, nyngkong la pynlong ha shnong Maikhuli bad hadien kata pat, la pynlong sa ha shnong Umpher, ha kaba lyngba katei ka jingialang, la sakhi da ka jingdon u Bah Sosthenes Sohtun kum u Kyrtong MDC ka NPP, kiwei ki heh nongialam ka NPP lem bad ki paid nongkyrshan jong ka NPP ha kitei ki thaiñ.

Haba ai jingkren sha ki paidbah ha kitei ki artylli ki jingialang, u Conrad K. Sangma, u la pynpaw ba kum u National President ka NPP, u sngew skhem eh ba u Bah Sosthenes Sohtun, Kyrtong MDC ka NPP na Jirang Constituency ba un jop don burom bad kata ka dei, namar ba ki paidbah ki la ïohi ia ki kam kiba u la trei ban wanrah ia ki kam pynroi, kiba u la wanrah sha ki shnong bapher bapher kiba hap ha Jirang Konstitwensi.

U Conrad Sangma, u la kyntu ia ki paidbah ha kitei ki thaiñ, ba kin ai ka jingkyrshan kaba pura ia u Bah Sosthenes Sohtun, kum u Kyrtong MDC ka NPP bad ynda u la jop, kan sa pynsuk ia ki paidbah ka Jirang Constituency, namar kin sa ïoh ia shibun ki kam pynroi, kata ka long na Secretariat bad na District Council ruh kumjuh.

Ha ka jingkren u Conrad Sangma, u la pynpaw ruh ia ki kyntien, ba ha kane ka kynti kaba mynta ka NPP ka don jingkyrmen bha ban ïoh synshar marwei ha KHADC bad ym tang katta, hynrei ha JHADC kumjuh ruh ha GHADC ruh kumjuh.

U Conrad Sangma, u la kyntu ia ki paidbah kiba la leit ban sakhi ha kitei ki artylli ki jingialang ialap Ilekshon ka NPP, ba ha kane ka kynti ba ki dei ban ai ka jingkyrshan kaba pura ia u Bah Sosthenes Sohtun, ba un jop kum u MDC na Jirang Constituency.