Shah rahbor ar ngut ki nongtrei ka Soil ha ki kaikhlaw na Aradonga

Nongstoin, 03 Nohprah:
Katba nang mih ki sngi nang jur ki kam pyntriem jong ki kynhun kaikhlaw na Garo bad ka jingshah rahbor ki briew ba lui lui ka dang iai bteng ha kum kitei ki kynhun kaikhlaw ha ki thain khappud jong ka West Khasi Hills khamtam ha ka thain Shallang bad ki jaka ba marjan.
Katkum ka tyllong khubor na ki pulit ka West Khasi Hills District, la iathuh ba myn ha ka sngi ba ar jong ka taiew kata ka 1 tarik Nohprah ar ngut ki nongtrei jong ka tnad Soil ha Aradonga ki la shah rahbor noh ha ki kynhun kai khlaw ki bym shymla tip satia la ki dei ki ei.Ia katei ka khubor ki bor pulit ki dang ioh ia ka jingtip mynta ka janmiet bad ia kitei ar ngut kiba la shah rahbor la tip kyrteng kum u Moheshwar Das u ba dei u Nong thung jingthung jong katei ka ophis bad u wei pat u Nirench Kalita u ba trei kum u master Roll ha katei ka juh ka ophis.
Shuh shuh ka khubor na ki pulit ka iathuh ruh ba ia kitei ki ar ngut la shah rahbor ha kapor 11 baje ei ei myn miet jong ka sngi ba ar na ka quarter jong ki kaba don ha ka khlaw kaba la tip kum ka khlaw Kam rengchi kaba dei ka jaka thung jingthung jong katei ka ophis bad kaba jngai tang kumba 6 KM ei ei na ka Aradonga Out Post.Na ka liang jong ki pulit ka WKH ki dang pynlong ka jingthwet kaba jur ban lap ksai ia kitei ki kaikhlaw bad kumjuh ki dang pynlong ruh ka jingkhynra kaba jur bha ha katei ka khlaw bad kumjuh ha ki thain Aradonga khnang ba kin ioh pyllait im ia kitei kiba la shah rah bor.