Sei madan u bah Prestone, ia ka daw ba u phet na ka seng Congress

Sngewieid ban tip ia ka jing shisha halor ka jingphet seng Congress jong U bah Prestone Tynsong, ha u snem 2018 bad ka daw jong katei ka jingphet seng jong utei u rangbah, ka dei pleng, tang na ka jingkynriah ia kawei ka Block ophis na Wapung sha Lumshnong, kaba la rai da U Mukul Sangma, myntri rangbah ka jylla, ha katei ka por.

Lyngba katei ka jingkren, ka la shai kdar mynta ka sien, ha kaba ka jingphet seng Congress jong U bah Prestone Tynsong, kam dei pleng na ka daw jong ka jing ijli jongu ia katei ka seng, hynrei ka dei ka daw shimet jongu bad U Mukul Sangma bad lada ka long na katei ka daw, ka pyn pyrkhat lehse ia uba bun ia ka kyrdan nongialam jong utei u rangbah, ha kaba tang na katei ka jingiapher jingmut shimet bad u myntri rangbah, ula phet noh bak, na ka seng, kaba la pynheh pynsan ia u bad kaba la pynjop elekshon ia u ruh ha ka sien nyngkong, ha u snem 2003.

Ka long ruh kaba lyngngoh ba ha katei ka sien, utei u nong ialam barim jong ka seng Congress, um shym la kren eiei ruh em, ia katei ka ishu, hynrei u thad madan ha ryngkat bad U Conrad Sangma, u heh duh jong ka NPP, ba katei ka sorkar, ka dei ka sorkar kaba bamsap tam ha ka ri India hi baroh kawei.
Mynta haba utei u rangbah, ula sei madan ia ka daw, ka la dei ruh ba u paidlang ka jylla, khamtam ia ka Constituency, kaba u mihkhmat, ba kin thew tarajur bha, la ka jingphet seng, ka iahap ne em, tang na ka daw jong uwei u briew bad nangta, la ka jingphet seng, ka iahap ne em, tang na ka daw jong ka jing kynriah ia iwei i ophis Block bad ngi la nang mut, ba ki don da kiwei ki daw, kum ka ishu bamsap ia ka sorkar jong U Mukul Sangma, lane ka jingleh shiliang jong U Sangma, ha kaba iadei bad ki kam kiba ktah ia ka jaitbynriew Khasi baroh lang.

Ka jingkren jong U bah Tynsong, ka la long ka sakhi kaba biang bha bad ka ban sah kynmaw; hynrei katba ka jia ngin khmih lynti, ba un nym phet noh, sa na ka seng NPP bad ba lada u phet ruh, un kren ia ka jingshisha bad ba um dei ban tieng iap bad ban sa sei madan ia ka daw, hadien 7 snem, kumba ula leh ia U Mukul Sangma.
Ha kajuh ka por, lada ka jing kynriah ia ka ophis Block na Wapung sha Lumshnong, hynrei ka wan pat sa ka jingkynriah kaba mynta ia ka Medical College, ka jing kynriah ia ka University bad sa bun bah ki skhim pynroi kiba la kit da ka sorkar U Conrad Sangma, sha Garo hills, ki la long ne em ki daw kiba U Bah Tynsong, un hap ban peit bniah bha ialade, ha ka jingiadei jongu bad kane ka seng NPP?