Nongpoh, 11 Rymphang: Ka tyllong khubor kaba la iohlum, la ong ba u Bah Witness Sancley, u rangbah uba la aireng na ka Congress ban iakhun ha ka Ilekshon MLA ha u 2018 na Jirang Constituency bad uba la shah rem salit tang da katto katne vote hakhmat u Bah Sosthenes Sohtun, kyrtong ka NPP, mynta u la pyniasoh noh ialade sha ka NPP bad uba la rai ban kyrshan noh ia u kyrtong ka NPP ha kane ka Ilekshong jied nongmihkhmat sha ka Khasi Hills Autonomous District Council (KHADC).
La ong ruh ba ha katei ka sngi, ba u Bah Witness Sancley, u la leit ban pyniasoh sha ka NPP, ka dei hapoh ka shnong Patharkhmah, Ri Bhoi Sepngi bad ha katei ka sngi ba u la pynthikna ba u la rung sha ka NPP, la sakhi da ka jingdon u Bah Sosthenes Sohtun, MLA Jirang bad uba dei ruh u Kyrtong MDC ka NPP na Jirang Constituency.
Ka tyllong khubor, ka iathuh ba katei ka jingleit ban pyniasoh NPP u Bah Witness Sancley, ka long ban ai ka jingkyrshan kaba pura ia u Bah Ssothenes Sohtun, Kyrtong MDC ka NPP na Jirang bad ha katei ka sngi kaba u la leit ban rung sha ka NPP, u la leit ha ryngkat lem bad ki nongbud bad kiba dei ruh ki nongkyrshan jong u.
Lah ruh kum ban shu kdew hangne, ba u Bah Witness Sancley, uba la iakhun ia ka Ilekshon MLA ha u 2018 na ka Congress bad u la iakhun ruh ha ka Ilekshon MDC ha u 2019, hadien kata pat u la leit ban pyniasoh noh ialade sha ka UDP ha ka Ilekshon 2023, hynrei mynta pat u la leit ban pyniasoh noh ialade sha ka NPP bad uba la rai ban kyrshan noh ia u Bah Sosthenes Sohtun, Kyrtong MDC ka NPP na Jirang Constituency.
Phi don ban ong eiei?