Slem bah ka shong phatok ki heh ka sorkar MDA

Mynta ka kynti, u bah Prestone Tynsong, symbud myntri rangbah, ula kob biang ia kito kiba kynnoh bamsap ia kane ka sorkar Meghalaya Democratic Alliance (MDA) bad u dawa ba kin ejahar noh mar mar ha ki thanat pulit, pyrshah ia kito ki myntri jong kane ka sorkar, kiba ki lap ba dei kiba bamsap.

Katei ka jingkren jong utei u rangbah, ka iahap bha ia ki nongialam jong u prah, kiba la kob sob ban set phatok ia ki nongialam jong kane ka sorkar MDA, mar ia jop ia ka elekshon MP bad la kynmaw ba ki nongialam jong katei ka seng, khamtam U bah Ardent Basaiaw moit, u da kob ha ki rynsan elekshon bapher, ba un dawa ia ka CBI bad ka ED, ba kin wan tohkit ia ki kam bamsap jong kane ka sorkar synrop, ba la khlieh da U Conrad Sangma.
Une U MP jong u prah, ula jop elekshon mynta la shisnem, hynrei kat haduh mynta, um shym la pynkhih satia, wat tang ia i tyrsim jong ki nongialam jong kane ka sorkar MDA bad um pat shym la kren ruh wat tang shi kyntien ia ka jing kynnoh bamsap jongu, ha ka dorbar bah Parliament, kumba ula kren kob sob ha ki rynsan elekshon bad ka dei na katei ka daw, ba u bah Prestone, ula pynkynmaw biang ia ki nong ialam jong u prah, ba kin ejahar noh mar mar, lada ki lap, ba ka don ka jingbamsap jong kane ka sorkar.

Lyngba ka jing pynkynmaw jong U bah Prestone, ka la donkam mynta ia ki heh jong u prah, ba kin iaid noh mardor ia ka jingtohkit jongki pyrshah ia kane ka sorkar MDA bad ba kin tied miej ha Lok Sabha, lyngba uwei u MP jongki, na ka bynta katei ka jingtohkit kaba ki la sei ia la ki kular sha u paidlang ka jylla, hynrei lada jia ba kim nud ban ang hapoh Lok Sabha, katei ka pyni, ba ki nongialam jong kane ka seng sain pyrthei, ki dei pynban, tang ki pleiar surok, kiba shu kyrkait ban pynbieit paidbah, katba kim nud satia ban leh shisha da ki kam bad lada ka long kumta, ka pyni shai, ba kane ka seng sain pyrthei, kam don jingpher eiei ruh em, na kaba ki la sob sarong ki jong U Conrad Sangma bad u bah Prestone Tynsong, ha u snem 2018, pyrshah ia ka sorkar jong U Mukul Sangma bad ba ki da pynbudnam, ba katei ka sorkar, ka dei ka sorkar kaba bamsap tam ha baroh kawei ka ri India bad kine ki jait jingkren, ki long tang ban thad burom pynban ia ki nongialam jong ka jylla, tang na ka bynta ban ioh pynkhie rasong ialade bad ban pynbieit briew, ban ioh vote kham bun, kumba ki la leh kine ki nongialam jong ka seng VPP, ha ka elekshon Lok Sabha 2024.