Ujor ki Rangbah Shnong sha Delhi, ba pynslem U Lat ia ka VAB

Shillong, 3 Nohprah:
Ki nongialam jong ka Synjuk Ki Nongsyn shar Shnong Ka Bri U Hynniewtrep, ki la ia kynduh mynta ka sngi, ia u myntri kam poh iing jong ka sorkar India, U Kiren Rijiju bad ki la ai ia ka dorkhas ha u, ha kaba ki dawa, ba dei ban mynjur noh ia ka ain ba la phah da ka Khasi District Council, ka Khasi Hills Autonomous District (Village Administration) Bill, 2015 bad kumjuh ruh ia ka ain Village Administration Bill, ba la phah da ka Jaintia Hills Autonomous District Council, kaba dei ban mynjur da U Lat ka Jylla. Katei ka kynhun ka kynthup ia U Dr W. Kharshiiing President, Bah R L Blah General Secretary, ha ryngkat bad ki dkhot jong ka Synjuk, kiba kynthup ia U Bah E Lytan, E L Nongrang, E G Kharbani, Gilbert G Laloo, S S Langi, Rangsan Sohmat. Ha ka jingleit la don lang ruh U bah VGK Kynta, u nongiasaid ain ba rangbah bad U Bah E K Sutnga, uwei na ki riewsaid ain. Ha ka jingiakren bad u myntri, na ka liang jong ka Synjuk, ka pynpaw ia ka jing bym sngew tynnad jongka, halor ka jingleh jong une u lat ka Jylla, ha kaba ula shu pynslem kai ban mynjur ia katei ka ain, wat haba kitei ki ar tylli ki iing dorbar jong ka Khasi bad Jaintia District Council, ki la ai ia ka jingmynjur halor kitei ki ain baroh ar tylli, katba kum ka kyndon jong ka Sixth Schedule. La kynthoh ruh da ka Synjuk, ba ka jingphah jong U Lat sha ka tnat kam poh iing, na ka bynta ban peit biang ia katei ka ain, ka long ka bym iahap satia bad ka bym ia dei bad ka jingbthah jong ka Sixth Schedule.
Ka Synjuk, ka lyngngoh ruh ba balei U Lat, um shym la mynjur noh ia ka ain jong ka Jaintia District Council, haba ula kren hi dalade ha ka jing ia kynduh bad ki nongsynshar shnong, ba ka long kaba iaid beit iaid ryntih. Katei ka kynhun, kan dang buddien, ha ka jingiakynduh lashai ka sngi ruh bad kiwei pat ki heh sorkar jong ka tnat kam poh iing bad kin thawlad ruh ban ia kynduh ia kiwei pat ki nongialam ha Delhi. U myntri khynnah ka kam poh iing, ula pynpaw ia ka jingsngewkhia bad u pynthikna ba un beit ia katei ka kam ba kan urlong noh kloi katba lah.