Kyllon iap u nongialam ka GNLA ha ka jingiather kuli bad ki pulit

Shillong, 3 Nohprah:
U nongialam Commander ka Eagle Hunter ka GNLA, (ka kynhun kaba dang shu thaw mynshem snem ban hiar thma ia ki pulit) u la kyllon iap mynta ka sngi ha ka jingiather kuli kaba la neh kumba 10 minit eiei bad ki pulit SWAT. Katei ka jingjia ka la jia mynta ka sngi ha ka por ba ki pulit SWAT ki la leit ban khynra ia ka ktem lehnoh ha Durama kaba don hajan ka shnong Khakwa Duragre, East Garo Hills. Utei u nong ialam ka Eagle Hunter uba la kyllon iap u dei uba la tip kyrteng kum u Kennedy Sangma bad la ju khot sin ia u kum u Hebel, katei ka jingjia ka la jia ha ka por 7:30 baje mynstep. Ki pulit ki la ioh kurup bun ki tiar ialeh na katei ka jaka kaba kynthup ia ka Draganiv Snipper Riffle, 24 tylli ki kuli AK bad bun ki kuli suloi, ki la ioh kurup ruh 4 tylli ki mobilephone na katei ka jaka ba u kyllon iap.
U SP ka Eas Garo Hills u Davies Marak u la iathuh ba ha ka jingleit khynra lehnoh ki pulit mynta ka sngi ha ka khlaw Durama , kynsan kynsan san ngut ki kynhun GNLA kiba la kieng da ki atiar kiba khlain bor ki la ther kuli kynsan sha ki pulit bad hangtei ka la mih ka jingiather kuli kaba mar kylliang kaba la neh haduh kumba 10 minit eiei bad hadien ba la kynjah jar la lap ia ka metiap jong utei u nongialam ka Eagle Hunter.U Hebel u dei u dkhot uba la wan pyniasoh sha ka GNLA bad u la long ruh u Commander ka GNLA ha ki thain ka Chokpot bad u dei ruh ha kajuh ka por u Commander ka Eagle Hunter. Ha u 2013 u Hebel u la shah kem ha ki pulit na Chokpot, South Garo Hills hynrei u la ioh phet krad na Tura district Jail, u dei uba la donkti ha kiba bun ki kam pyntriem kynthup ka jingther kuli ia ki pulit ha Panda mynta u snem.