Shillong 11 Rymphang: U nongrwai bapaw ka pyrthei, kata U Ed-Sheeran u ba dei na ka Ri Bilat, un sa wan ban pynlynghuh bad pyntdem ha Nongbah Shillong ha madan Jawaharlal Nehru (JN) Stadium lashai ka sngi ka 12 tarik u Rymphang 2025.
Ka jingpynkhreh ia ka jingwan rwai utei nongrwai bapaw jong ka pyrthei, ka la iaid shait shait ha kaba la sakhi mynta ka sngi baar ka 11 tarik Rymphang 2025, ba katei ka jaka ban pynlong ia katei ka tamasa, ka la itynnad bad phuh hi kdar.
U tei u nongrwai mynta ka sngi u la dep wan poi ha Umroi Airport ha kapor kumba shiteng sngi eiei bad ha Shillong pat u la wan poi ha kapor janmiet eiei. La khmih lynti ruh, ba ka jingwan jong ki paidbah nongkyrshan u Ed-Sheeran ha katei ka tamasa kin don palat 26 hajar ngut.
Haba leit ban jngoh nakaliang u nongthoh khubor mynta ka sngi ha katei ka jaka, la iohi, ba ki bor pulit ruh, ki la pyrshang ha kaba iadei bad ka sngi ka ba la shai, kumno ban pahara bha ban lait na kino kino ki jingjia ba sngewsih ne kulmar lashai ka sngi.
Nakaliang ka sorkar jylla lyngba ka tnad kam jngohkai pyrthei ka la ai ka jingkyrshan, ha kaba na ka liang u myntri kam jngohkai pyrthei u bah Paul Lyngdoh u la leit ban jurip mynta ka sngi ia ka madan JN, hashwa ban wan iuhkjat u Ed-Sheeran lashai ka sngi.
Ki surok lynti ban poi shaduh madan JN la pynkhuit lut plaiñ bad ki nongpynkhuit mynta ka sngi ki la ia bunkam, ha kaban sar ban bunkam ia ka jingdonkam ki paidbah ki ban sa wan lashai ka sngi, kum ki ja ka pynieng kali, ki ja ka ba la pynitynnad ba la wah da ki dur wah dar ban khot sngewbha ia ki briew bad ruh ladep pynitynnad shuh shuh shapoh ka madan ka ba dei ka jaka ban ieng rynsan u Ed-Sheeran ban ai jingrwai.
Ka sorkar jylla ka la pynlong ia kane k tamasa ha Madan JN stadium, kadei namar, ba ka jaka ka la bianglut nadong shadong naduh ki jaka peit ki paidbah ba wan sngap, nalor kata kadei ka jaka ka ba heh bad kylluit.
Kum ban shupynkymaw hangne, ba myn ha ka 10 tarik u bnai Nohprah snem 2024, u nongrwai bapaw ka pyrthei, kata u Bryan Adam ula wan iuhkjat ha madan JN Stadium, ha ka jingsakhi da ki lak ngut ki nongkyrshan ha na ka jylla bad na kiwei de ki jylla. Kumjuh ruh ha ujuh u snem 2024, ki nongrwai bapaw ka pyrthei, kata u Akon, Boney M, ki la wan ban pynlynghuh ha Ri Bhoi, kaba dei ka Cherry Blossom.
Phi don ban ong eiei?