Ther U Bah Pynshngaiñ ia u bah HDR

Shillong, 3 Nohprah:
Hadien ba la mih ki jingkynthoh na u bah HDR Lyngdoh myntri ka tnad District Council Affairs halor ka elekshon MDC shiteng samoi hadien ba la risaiñ noh ki 7 ngut ki MDC, u ba Pynshngaiñ N syiem mynta ka sngi u la ther tyngeh ia u bah HDR ha kaba u la ong hawto u bah HDR u lah ne-em ban iathuh na ka tyllong aiñ aiu u lah ban pynlong ia ka elekshon shiteng samoi hapoh 6 bnai bad na kino ki kyndon ka 6th Schedule ka ri India. “Ki kyndon ka Sixth Schedule kim shym la kdew hangno hangno ruh ba dei ban pynlong elekshon shiteng samoi hapoh 6 bnai , u bah HDR u de ban pynlut khyndiat ban pule ia ka 6th Schedule” ong u bah Pynshngaiñ.U bah Pynshngaiñ u la ong ba lada ka sorkar kan pynlong ia ka elekshon shiteng samoi kan hap ban pynlut na ka pisa jong ka District Council, kumta lada ka Council kam shym la mynjur kin ym lah ban pynlong ia ka elekshon shiteng samoi, ka sorkar ka die ban sngewthuh ba ka Counci ka don hapdeng ka jingkyrduh pisa. Lada pynlong elekshon u bah Pynshngaiñ u la ong ba kan lut kumba T.2 klur tyngka eiei bad u la ong ba ka Council ka pdiang burom ia ka elekshon shiteng samoi lada ka sorkar ne u bah HDR Lyngdoh u kloi ban bei tyngka ia ka jinglut jingsep baroh. “Lada ka sorkar ka kwah ban pynlong elekshon kam dei ban ktah ia ka bhah pisa jong ka Council” u la ong.Utei u CEM ka KHADC u la pynbna ruh ba la 14 tarik u nohprah ka Council kan pynlong ia ka Dorbar kyrpang ban shim ia ka rai kaba ia dei bad u MDC shu sieh, u la ong ba ki 19 ngut ki MDC ka KHADC ki la aiti ha u ban jied ia u MDC shu sieh bad ban pyntip sha ka PDF ia ka kyrteng shuwa ban rah sha ka Dorbar. U ba Pynshngaiñ u la ai ksai ba ha kane ka kynti ba mynta ka donkam ban jied MDC shu sieh da u briew uba lah ban noh synniang sha ka Council bad u bym don jingthmu ban ia khun elekshon namar ba u la ong ba la iohi ba u bah Gabriel Wahlang ruh u la risain noh tang na ka daw ba u kwah ia leh elekshon.
Ia ka kyrteng u MDC shu sieh u la ong ba yn shim ia ka jingmynjur hapoh ka ing dorbar bad ia kaba kum katei ka kam u la ong ba la ju leh ruh ha kip or kiba mynshuwa ba ka rule ruh ka kren shai ba ka District Council ka lah ban tyrwa ia ka kyrteng u MDC shu sieh.U CEM u la ong ba ha ka taiew ban wan ka Council kan leit ban ia kynduh ia u Lat ka jylla ban ia kren bha halor ka VAB ba u dei ban pynsted noh ia ka, haba la kylli la un bhah kam thymmai ne em ban ai bynta lang ia ki MDC kiba la wan pyniasoh sha ka PDF u la ong ba haduh mynta kam pat don kano kano ka jingpyrkhat hynrei kan shong ha ka jingstad jong u ban pynhun ia baroh.