Nongpoh, 06 K’lyngkot: Haba kren ha ka jingialang ka Dorbar Kur Umbah Pyllun, kaba la long mynta ka sngi ha shnong Lamalong ha Ri Bhoi, u Bah Morningstar Umbah, Rangbah Kur jong ka Kur Umbah, u la ban jur halor ka jingnang hiar ka akor bad ka burom hapoh ka Kur, ha kaba bun na ki para Kur kim don shuh ia kata ka burom ka akor ne ban burom ia ki Kñi, ha kaba kum kane ka jia la jan ha baroh ki Kur kiba don hapoh ka Bri u Hynniew Trep.
Kitei ki kyntien jingkren jong utei u Rangbah Kur ka Kur Umbah, ka dei ha ka jingialang ba ka Kur Umbah, ka la pynlong ia ka Dorbar Kur Umbah Pyllun kaba saw hapoh ka Bri u Hynniew Trep, ia kaba ki la pynlong ha shnong Lamalong, Raid Namsha Ri Bhoi District.
Ha ka jingkren jong u Bah Morningstar Umbah, u la ong ruh ba kumba ka long mynta, la don ka khep ba ki Kñi Rangbah hapoh ka Kur, kim don jingtip shuh ha ka por ba ki khun Pyrsa ki iapoikha bad uno uno ne kano kano ka briew bad kane ka shait jia ym tang ha ka Kur Umbah, hynrei ha kiwei ruh ki Kur, kaba la nangpynhiar kyrdan ruh wat ia ka akor ne burom Khasi, kaba la ialam da u longshwa manshwa.
Namarkata, lyngba katei ka jingialang hapdeng ka Kur Umbah, na ka liang utei u nongialam Kur, u la kyntu ia ki Longkmie na ka Kur Umbah bad kumjuh ruh ia ki longkpa na ka Kur Umbah, ba ki dei ban nang ha ka ban sneng bad kyntu ia ki khun ki kti, haba iadei bad ka burom ka akor bad nalorkata ba ki dei ruh ban hikai ba kumno kin nang ban burom ia ki Kñi bad ia kiba la heh la san, u la bynrap.
Ha katei ka jingialang Kur Umbah ba shisien shi snem, la wan iashim bynta da ki nongialam na ki 7 tylli ki Circle, kiba kynthup na Umlaper, Mawtari, Bhoirymbong, Nongtluh Mathan, Umtarkhang, Korhadem bad na Lamalong Circle.
Lyngba jong katei ka sngi, na ka liang ka Kur Umbah, ka la ïoh ruh ban pynkup burom kaba kyrpang ia u Bah Dorbansing Umbah, u Rangbah uba la trei shitom naduh ki snem 1978, na bynta ban lum ban lang bad ban wanrah ia ka jingiaithuh hapdeng ki para Kur Umbah.
Ha katei hi kajuh ka sngi, la ïoh ruh ban jied ia ki nongkitkam ba thymmai ka Kur Umbah, ki ban sa trei na bynta ka samoi treikam jong u snem 2026 haduh u 2028, ha kaba ki nongkitkam kiba hakhmat ki kynthup ia u Bah Jwes Umbah kum u President, nangta u Chesterfield Umbah kum u General Secretary lem bad kiwei de ki nongkitkam kiba hakhmat jong ka Kur Umbah.
Phi don ban ong eiei?