Nongpoh, 03 Rymphang: Kat haduh ba la kut ka sngi thep kyrtong jong ki kyrtong MDC ki ban sa iakhun na ki 5 tylli ki Konstitwensi ha Ri Bhoi, ki la don kumba 26 ngut kiba la pyndep ia ka jingleit ban thep kyrteng bad kumta ha kane hi ka sngi, baroh kitei ki 26 ngut ki kyrtong, ki la ioh ban long kum kita ki kyrtong ba pura ha ka MDC bad kata ka dei hadien ba ki kot ki sla jong kitei ki kyrtong, la dep ban bishar bniah bad la lap ba ki biang ia ki kot ki sla bad kiba don hok ban iakhun ha kane ka ilekshon MDC.
Kumba ka long mynta, na ki 5 tylli ki Konstitwensi ha Ri Bhoi, saw tylli ki Party kiba la lah ban pynieng kyrtong ha baroh 5 tylli ki Konstitwensi, kita ki kynthup ia ka NPP, ka UDP, ka Congress bad VPP, nangta 4 ngut na ka BJP kata ki ban iakhun na Umsning, Mawhati, Nongpoh bad Jirang, uwei na ka KHNAM u ban iakhun na Mawhati Constituency bad u Bah George G. Lyngdoh kum u kyrtong shimet bad u ban iakhun na Umroi Constituency.
Khyndiat haba phai halor ka jingialam paidbah da ki kyrtong, la ka long ha ka sngi thep kyrteng bad ha ka sngi Scrutuni ne ka sngi ban bishar bniah ia ki kot ki sla, la iohi ba mynta ka sngi ba kitei ki kyrtong ki la leit ban shah bishar bniah ia ki kot ki sla, ka jingleit synran ki paidbah ka kham bun, ban haba ianujor bad ka sngi kaba ki leit ban thep kyrteng.
Haba peit ia ka jingdon jong ki nongkyrshan kiba leit ban synran ia ki kyrtong sha ka sngi ban bishar ia ki kot ki sla jong ki kyrtong, la iohi bad sakhi ba kiba la bun eh kiba leit ban synran ia u kyrtong, ka dei ia u kyrtong MDC ka Jirang Constituency, ha kaba la iohi ba ki nongkyrshan ki la leit ban kyrshan met bat mynsiem ia utei u kyrtong ka NPP na Jirang Constituency.
Phi don ban ong eiei?