Haba ka wan ka elekshon jong ka Khasi District Council, ka mih ka jingiakren halor ki riti dustur jong u khun Khasi Pnar bad ha kaba iadei bad kane ka mat, ka don ka khyndew ka shyiap, kaba ngi shim ba ka dei ka hok nongkynti jong ki trai jaka lem bad ki bor jong ki Raid ne ki Hima lem bad ki ain kiba ka District Council, ka dei ban ri ban da ia kitei ki riti ki dustur.
Hynrei haba ngi peit ia kane ka bynta, ngi iohi, ba kumno ka sorkar MDA, kaba la khlieh da U Conrad Sangma, lem bad ka Executive Committee kaba la ialam da ka UDP bad ka kynhun synrop jongka, ba ki la pyndem ha ka bor jong ka sorkar Assam, da kaba ki pynkhein ia baroh ki kyndon bat khyndew jong ki riew shimet bad ki bor hima, ha kaba ki la aiti ia ka jaka kaba 19 square kilometre sha ka Assam, ha ka soskular kaba ki la soi ha u snem 2022.
Kam dei tang katta, ngim lah klet ruh, ba ki don kumba 7,8 ngut ki MDC jong ka seng NPP, kiba la niewbein ia ki Syiem, ki Sirdar bad ki trai jaka, da kaba ki kyrshan ia ka soskular jong ka sorkar Meghalaya bad ka Assam, ha katei ka jing iasoi soskular ki ar jylla.
Ha kaba iadei bad u pud jong ka India bad ka Bangladesh, la iohi, ba ka District Council, ka la thet kti ialade, halor katei ka mat, ha kaba ka la shu ailad ia ka sorkar India, lyngba ki kontraktor jongka, ba kin kurup katba mon ia ki jaka puta, kiba don sha khappud jong kitei ki ar tylli ki ri bad katei ka pyni, ba kam salia ia ka jingduh ei jong ki jaka kiba poi da ki spah kilometre ha u pud jong ka Bangladesh, tang na ka daw jong ka jingker sainar shiah bad kane ka la kylla long ka jingtim kaba khraw ia ki nongshong khappud, ha kaba kitei ki jaka kiba hap sha lynder jong u sainar shiah, ki la kam trai bad thombor ki khar Bangladesh, namar ba ki shipai BSF ruh kim shlan shuh ban pahara ia kitei ki jaka kiba don sha lyngba jong ka jingker sainar shiah.
Mynta ka elekshon MDC, ka la poi bad kumta ka dei ka kamram jong u paidlang nongthep vote, ba kin sngewthuh ia la ka jong ka bynta bad ka kamram jongki, ha kaba jied ia ki dkhot sha ka Council bad kumta, lada ki sngew dei ba kin long trai ia ki jaka puta, ki dei namarkata, ba kin peit biang ia kitei ki ar tylli ki mat, kiba la jia ha kine ki khyndiat snem ba ladep bad kitei ki kynthup ia ka jingkurup ei jong ka Bangladesh ia ki jaka ba seisoh sha thain Riwar bad nangta sa ka Assam na shaneng ia kiba bun ki jaka kiba dei ka spah bah jong ka ri Khasi bad kiba pynlong ia ki trai jaka, ba kin long sohshnong ha la ka jong ka ri bad ba kin nym iohlad shuh, wat tang ban thaw ia i ing tap shiliang, ba kin shong kin sah ialade.
Phi don ban ong eiei?