Ngan buddien ia ki dienjat u Ma Ieit Hoping: Jyndiang

Shillong, 03 Nohprah: 
U MLA ba dang shu shah jied na Nongstoin na ka HSPDP u Bah Diosstarness Jyndiang u la shah pynbam smai mynta ka sngi ha u Lamphang iing dorbar u AT Mondal ha iing dorbar thawain ha ka jingsakhi lang ki myntri sorkar kynthup u Symbud Myntri Rangbah Dr RC Laloo, ki MLA liangpyrshah bad ki nongkitkam ka HSPDP.
    U Bah Jyndiang u la shah jied kum u MLA ha kane ka elekshon shiteng samoi na Nongstoin hadien ba u Bah HS Lyngdoh u la khlad noh. U dei u MLA ba nyngkong ba ka Nongstoin kan ioh hadien ba la ioh ia ka jingshakri kaba jlan jong u Bah HS Lyngdoh haduh ka sngi ka jingkhlad noh jongu na kane ka pyrthei.
    Haba iakren bad ki nongthoh khubor hadien ba la bam smai, u Bah Jyndiang u la ong, “Ngan pyrshang ban kren ha iing dorbar ia kiei ba u Maieid HS Lyngdoh u la sahnud”.
U Bah Jyndiang u dei u nongniah kali jong u Bah HS Lyngdoh ha ka por ba u long MLA bad mynta un long syndon u nongniah jong ka kaliNongstoin konstitwensi na ka bynta lai snem kaban wan haduh u 2008. U la ong ba kum u MLA thymmai un iasyllok bad u president u Bah Ardent M Basaiawmoit ban iakren ban leh ia ki kam jong ka jaitbynriew. Katba u Bah Ardent M Basaiawmoit uba don lang ha kane ka por, u la ong ba kum ka party ka long kaba eh ban buh por ban pyndep ia ki kam namar ba kam don ha ka sorkar. “Ngi don ha ka liangpyrshah, ka eh namar ban ong ban pyndep ia ki kam hynrei ngin pyrshang ban kren ha iing dorbar kaei ba ka jaitbynriew ka donkam”, la ong u Bah Ardent.