Ka jingshongshit ki paidbah ha u Prah, ka Bom ngim tip, ngin iaid beit la kajong ka nongrim:Dr OS. Jyrwa

Shillong 27 K’Lyngkot: U Dr O.S.Jyrwa ula ong ba, kata ka jingshongshit ki paidbah ha u Prah ne ha ka bom ngim lah ban tip namar kata ka jingshongshit ki paidbah kan iaid beit ha u paidbah, hynrei mangi pat ngin trei la kajong ka nongrim kumba ngi la trei ia kam hapoh ka konstitwensi.

Ia kane u Dr O.S.Jyrwa ula kren sha ki lad pathai khubor mynta ka sngi nyngkong ka 27 tarik kyllalyngkot 2025, hadien ba ula leit ban thep kyrteng ialade ha ka ophis ka Deputy Commissioner, East Khasi Hills District kum u kyrtong shimet ban ialeh ia ka ilekshon MDC ha District Council na Mawryngkneng Konstitwensi.

U Dr O.S.Jyrwa ula iathuh ruh, ba ula ieng iakhun ia ka ilekshon MLA na Mawryngkneng la kumba 3 sien eiei bad ki paidbah ki la pynbor ban ieng ialeh noh ia ka ilekshon MDC ha kito ki snem ba la dep hynrei um treh, katba ha kane ka ilekshon MDC ba mynta pat ula ieng iakhun namar ha ka ilekshon MLA ba dangshudep ula shu rem salit.

Ula ong ruh, ba lada unjop, ka District Council kadei kata ka nongiada ia ka Six Schedule lane kata ka khyrnit ka ba phra bad ruh ban pynneh pynsah ia ka khyndew ka shyiap.