Sa ar sngi, yn kut ka shibnai ki Rangbah Shnong ia ka VAB

Shillong, 2 Nohprah:
Ha ka 5 tarik u naiwieng, ki nongsynshar ka Bri u Hynniewtrep hapoh ka jingialam u Dr.Werlok Kharshiing u President bad u bah RL Blah General Secretary ki la ai por ia ka sorkar shibnai ba kan pynlong aiñ noh ia ka Village Administration Bill (VAB) bad katei ka jingai por jong ki kan sdang naduh katei hi ka sngi bad kan kut ha ka 5 tarik mynta u bnai bad mynta haduh ba thoh ia kane ka khubor ka dang sah sa lai sngi ban kut noh katei ka por ba ki la buh. Katei ka jingai por ki Rangbah Shnong ka dei ha katei ka juh ka sngi ba ka kynhun kaba 30 ngut jong ki ki la leit ban ia kren bad ka sorkar jylla kaba ialam da u Dr.Mukul Sangma myntri rangbah ka jylla, ha ka jingialang kaba la long ha kamra long jingialang ha Secretariat.Hadien ba la de ia kren bad u Mukul ryngkat ki kynhun myntri jong u ia kata ka jingai por kaba shibnai, ki Rangbah Shnong ki la leit ban pynbna sha u paidbah ia ka rai ba ki la shim ha katei ka jingialang ryngkat ka jingai por kaba shibnai ia ka sorkar jylla. Hynrei lah ban pynkynmaw ba ha katei ka por u paidbah u la khih bitar pynban puk haduh ba la mih sa ka jingkulmar u paidbah bad ki pulit kiba don ha katei ka jaka ha Mot Kiang Nangbah hajan Civil Hospital, Shillong.Hadien ba la mih ka jingbym hun na u paidbah ha katei ka sngi haduh ba u la khih bitar haduh ban da mih ia ka jingiakawang maw, ka jingbom lathi bad ka jingsiat lyer pynsat khmat, haba twad jingmut na ki Rangbah shnong aiu kin leh ia katei ka shibnai kaba ki la ai por ki la jubab ba ka rai kaba ki la shim kan iaid beit kumba la pynbna bad katei ka shibnai ka jingdawa ban pynlong aiñ ia ka VAB kan iaid beit.Khyndiat sngi mynshuwa ki Rangbah shnong ki la leit ia kynduh biang ia u Lat ka jylla ban pynbor ba un ai jingmynjur noh ia ka VAB khnang ba yn lah ban pynlong aiñ noh ia ka hynrei ha ka jingthoh kaba ki la phah sha ki nongthohkhubor ki la ong ba u Lat u la kynthoh pynban ba don kiba iathuh ha u ba ki Rangbah shnogn Khasi Pnar ki dei kiba shu bu-aid kyiad beit tang shu dap 3 baje janmiet. Haduh mynta ym pat shym la ioh jingtip kaei ka lynti ba ki Rangbah shnong kin shim nangne shakhmat hadien ba la kut katei ka shibnai lada jia ba u Lat un ym pat mynjur ia ka VAB ba kan long aiñ. Hynrei la ioh jngtip ba ki Rangbah Shnong ha kine ki sngi ki la pynlong Executive khah khah ban ia kren ia katei ka kam hynrei haduh mynta kim pat ai jingtip eiei sha ki lad khubor.