Pyllait u MLA ia ka kali kit nongpang ka ban sa shakri ia ki paidbah ha ki 14 shnong ka thain Narbong

Nongpoh, 23 K’lyngkot: Ki nongialam shnong lem bad ki paidbah kiba shong ba sah ha ki shnong kiba don ha ka thain Narbong, Byrnihat ha Ri Bhoi, ki la kmen eh bad kata ka dei mynta ka sngi, ba u Bah Sosthenes Sohtun, MLA Jirang, u la leit ban pyllait paidbah ia kawei ka kali kit nongpang (Ambulance), kaba u la aiti sha ka Rural Development Committee, Narbong Circle, khnang ba katei ka kali kit nongpang kan ai jingshakri kaba janai ia ki paidbah ha katei ka thain.

Haba iadei bad katei ka kali kit nongpang, kaba u la pyllait mynta ka sngi, u Bah Sosthenes Sohtun, u la ong ba la thied ia katei ka kali kit nongpang lyngba ka skim SRWP ha ka jinglut kaba la kot sha ka T. 12 lak bad nalorkata la pynjanai bha ha ka dur jong ka kali kit nongpang, da ka jingiarap kiwei pat ki riew kylluid mynsiem.

Ha katei ka sngi, ba la pyllait paidbah ia katei ka kali kit nongpang, la sakhi da ka jingdon ki nongialam shnong lem bad ki riew rangbah jong katei ka thain Narbong.

Halor katei ka kali kit nongpang kaba la pyllait mynta ka sngi, na ka liang na ka liang u MLA, u la kyntu ia ki paidbah bad ia ki nongialam shnong, ba kin pyndonkam bha bad ba kin ri bad sumar bha, khnang ba katei ka kali kit nongpang, ba kan neh slem bad ka ban ai jingmyntoi shisha ia ki paidbah ha katei ka thain Narbong.