Sangeh shong kyrain kiba anna

Shillong, 02 Nohprah:
Ka seng jong ki briew ba duna dkhot met ka Khasi Disabilities Association (KDA) ka la pynsangeh noh ia ka jingthmu leit shong kyrain ha phyllaw ka Additional Secretariat hadien ba ka sorkar ka la kular ban peit ia ki jingeh jongki kaba la khot iakren ia ki hynne ka sngi.
U President ka KDA u Bah Starwin Kharjana u la ong ba ka daw ka jingsangeh jong ka seng ban iaid shakhmat ban pynlong ia ka jingshong kyrain ka dei namar ba u Principal Secretary ka Social Welfare u PW Ingty u la khot iakren ia ki nongialam ka seng mynta ka sngi bad la kular ban leh ia ki 10 tylli ki mat jingdawa jong ka seng khamtam ka bhah kam bhah jam bad ban thung ia ka komiti ban shong pyrkhat kam shisien shi bnai da ka ophis jong u Commissioner for Disabilities bad ka seng KDA.
“Halor kane, ka seng ka la rai ban sangeh noh ia ka jingthmu shong kyrain kumba la pynbna kham mynshwa bad la kyrpad ia ki dkhot ka seng ban shim ia kane kum ka jingpynbna”, la ong u bah Starwin Kharjana.