Hiar ki heh Congress ban pdiang sngewbha ia ki nongialam bad dkhot ka UCPF kiba la rung Congress ha Umroi

Nongpoh, 21 K’lyngkot: Ki nongialam lem bad ki dkhot jong ka Umroi Constituency Progressive Forum (UCPF), ia kaba la ialam da u Bah Pynskhem Sohtun, President ka UCPF, mynta ka sngi ki la pynthikna ba ki la rung noh sha ka Congress bad kiba la rai ruh ban ai ka jingkyrshan kaba tyngeh ia u Bah Micky Douglas Syiem, Kyrtong MDC ka Congress na Umroi Constituency.

Lah ruh ban kdew hangne, ba u Bah Micky Douglas Syiem, uba la ioh ia ka Ticket na ka Congress ban iakhun ha kane ka Ilekshon MDC na Umroi Constituency, u dei uba bat kum u Working President of UCPF, kumta ha kane ka jingleit iasoh noh jong u sha ka Congress, la synran lang da kiwei ki nongkitkam ka UCPF lem bad ki nongkyrshan jong ka.

Haba pdiang ia kitei ki nongialam ka UCPF sha ka iing jong ka Party Congress, la sakhi da ka jingdon u PN Syiem, Working President ka Meghalaya Pradesh Congress Committee (MPCC), u Bah M.G. Kharshanlor, President ka Ri-Bhoi District Congress Committee (RBDCC), u Stanlywiss Rymbai, MLA barim ka Umroi bad uba long kum u Working President of RBDCC lem bad kiwei.

Ia katei ka jingpdiang sngewbha ia ki nongialam bad nongkyrshan ka UCPF, la pynlong ha Madan Umroi, ha kaba la sakhi da ka jingdon jong kiba bun ngut ki riew rangbah jong ka ka thain Umroi hi baroh kawei.