Shillong:U MLA barim ka Mawlai Constituency u bah Process T Sawkmie, u la kren skhem ba ha Mawlai Constituency hi, ki nongshong shnong ka Mawlai kin ym treh ban pynjop ia ka MLA bad MDC na kawei ka Party.
Lah ban kdew hangne ba ha ka Election MLA 2023 ki nongshong shnong ka Mawlai Constituency ki la ai ia ka jingkyrshan pura ia ka party Voice of People Party (VPP).
Haba kren sha ki ladpathai khubor u bah Process T Sawkmie u la ong ba ka jinglong ki nong Mawlai hi ka long ba lada ia u MLA ki la jied ia kawei ka party, horkit hordang kin ym jied shuh na ka juh ka party kane ka long kumba la mad ha ki por mynshwa.
“Ha ki por mynshwa nga la jop kum u MLA bad nga la mih ban iakhun ia ka MDC hynrei ki paidbah kim treh ban jied ia nga, kumta hi mynta ruh haba ka MLA ki la jied ia u VPP, te nga tharai mynta kin ym jied shuh ia u Prah hynrei kin sa jied beit na kawei ka party” u la ong.
U la bynrap “Kumba ka long mynta hi ki paidbah ka Mawlai Constituency ki phai khmat sha nga namar ki sngewthuh ba ka Mawlai ka la heh bad ki sngewthuh ba ki dei ban ioh ka jingmyntoi lang na u MLA bad MDC. Ki paidbah ki kwah ban ioh jingmyntoi lang lada kim kynduh ia u MLA kin kynduh ia u MDC, kumta ha Mawlai hi nga thikna ba kin ym jied ia u MLA bad u MDC na ka juh ka party”.
Halor ka jingialap ia ka MDC election u bah Process u la ong ba ka jingialap election hi ka long shaitshait bad nga la rai ruh ban iakhun kum u kyrtong shimet bad kane ka dei ka rai jong ki nong Mawlai. Da kaba kdew ruh “Ia kiwei ngam kren hynrei ka jingiakhun kum u kyrtong shimet ka long ban long laitluid ka jingmut”.
Halor ka rai u bah Pathaw ban iakhun kum u kyrtong shimet, u la ong “Halor ka rai jong u ngan kwah ban ong eiei, hynrei ki paidbah kin hap ban sngewthuh ba u bah PT Sawkmie u dei u briew jong ki paidbah kiba mad jingeh ha kano kano ka rukom ruh nga dei beit u briew jong ki paidbah, ngan ym ong eiei halor kiwei hynrei nga dei u nongshakri paidbah”.
“Haba ia khun ia ka MDC election, lada ki paidbah ki kyrshan bad ngan long MDC ngan thaw ia ki ain ban iada jaitbynriew, kumba ngi ong ka District Council ka long ka stieh jingiada, ngan shim halor ki mad jingeh ia u paidbah, la ka dei halor ka trading laisen ne ban thaw ain kum jingai jingmut ban pynkup burom ia ki Rangbah shnong ha ki thain Mawlai bad kiwei kiwei nalor kata ngan buh ia ka tulop MDC tang na ka bynta ban wanrah ia ka jingmyntoi na ka bynta ki nong Mawlai ki ba wan na ki longing kiba duna bad kiwei kiwei” u la ong.
Phi don ban ong eiei?