Rai ka sorkar ban pynkylla ïa ka State Anthem ban pynrung ktien Pnar

Shillong:Ka sorkar jylla ha ka sngi Balang ka la rai ban pynkylla ïa ka Meghalaya State Anthem da kaba pynrung lang noh ïa ka ktien Pnar ha ki kyntien (lyrics).

Haba pynbna ïa kane ka rai hadien ka jingïalang ka Kynhun Myntri, u Myntri Rangbah Conrad K Sangma ula ong, “Nga kmen eh ban pynbna ba ka kynhun Myntri ka la rai mynta ka sngi ban pynkylla ïa ka Meghalaya State Anthem bad ngi kmen eh ban kynthup ïa katto katne laiñ ha ka ktien Pnar hapoh ka State Anthem”.
“Ïa kane yn sa pyllait ha ka Meghalaya Games, ka ban long ha Wahïajer ha Ri-lum Jaiñtia bad ngin sa tem ïa ka ha kane ka sngi,” ula bynrap.

U Myntri Rangbah u pyntip ba ïa kane ka rai la pynshong nongrim halor ki katto katne ki jingai jingmut na ki nongmihkhmat ka Ri-lum Jaiñtia khamtam u Symbud Myntri Rangbah Bah Sniawbhalang Dhar bad ki riew paidbah.