23 ngut ioh kyrdan MD ki samla na William Carey University

Shillong, 02 Nohprah:
Mynta ka sngi 23 ngut ki samla pule ka William Carey University, Shillong ki la shah pynkup burom ban pyndep ia ka kyrdan Master Degree (MD) jong ka Master of Arts ha ka sobjek Education, Environmental Management, Sociology, Social Work, English bad Political Science katba 3 ngut ki ioh ia ka kyrdan  Diploma degree ha ka sobjek Integrated Research Programmes.
Ha ka jingkren kum u kongsan u Bah DD Lapang u la niew tang ia ka jingim jong u  William Carey uba dei tang u nongshet hynrei  u la kiew sha ka kyrdan kum u riew khraw.  ”Nga don ka jingshaniah kaba pura ba ka William Carey University kan sa tyngshain bad kiew ha ki sngi ban wan”, la ong u Bah Lapang.
Haba pynkynmaw ia ki saw tylli ki jingiohi jngai jongu, u Bah Lapang u la ong ka pule puthi, ka ioh ka kot, ka mariang bad ka roi ka par ba iadei bad ka imlang sahlang ka long kaba donkam ia ki samla pule.
U la ong ba kane ka skulbah kan pyni sha ka pyrthei ba ka dei ka skulbah kaba pher na kiwei.  U la kyntu ia ki samla pule ban trei minot khnang ban pynlong ia kane ka pyrthei ka jaka kaba bit bad kaba biang ban im ban sah. “ Angnud, long ka spah, ka ram, long u nongialam, ym u nongbud, long u nongpyni lynti, ym u nongsahdien.  Long kumno mano mano, ha kano kano ka sngi, hangno hangno” la ong u Bah Lapang.Katba u Chairman ka Mizoram Board of School Education, u Dr. Lalchungnunga u la pynshlur ia ki samla pule ban bud ia ki dienjat jong u  William Carey. “Pyrkhat ia ka pyrthei, leh na jaka ba phi don.  Bun bah ki briew ki pyrkhat, hynrei kim leh”, u la ong. U la kyntu ia ki bor pyniaid ka WCU ban trei shitom ban kyntiew ia kane ka skulbah. U Dr. Ken Gnanakan u  Chancellor  ka University u la ong ba ka long kaba donkam ban kyntiew ia ka jingstad ha ka lynti kaba iasoh lang.Shwa ia kane, u  Vice-Chancellor u Dr. Paul Mohan Rai  u la ai ia ka kaiphod lyngkot jong ka skulbah ba la leh naduh ba la sdang.
Mynta kane ka WCU ka don 79 ngut ki samla pule bad 29 ngut ki nongtrei bad ka don ka jingiatreilang bad ka  Grace City kaba dei ka nongprat lynti kaba la buh ia ka William Carey University College ha Umsning ha ka jingheh kaba 40 akar ka jaka.Ha kane ka jingialang la don u Bah Robert  G. Lyngdoh u Vice-Chancellor ka Martin Luther Christian University, Shillong bad u Dr. E. R. Tongper u dkhot ka WCU bad u Director, TESPRO.