Shillong:Ka jylla Meghalaya ka la ioh ia ka skulbah la kajong hadien 53 snem ba la ioh ia ka jylla lajong.
Ia kane ka skulbah ka “Captain Williamson Sangma State University” la plie paidbah u myntri rangbah ka jylla, u Conrad K Sangma ha Balgre-Damalgre, kaba don hajan Tura tangba kaba hap ha South Garo Hills District.
Kiba sakhi lang ki kynthup ia u Speaker u Thomas A. Sangma, u Deputy Chief Minister Snaiwbhalang Dhar, u myntri pule puthi u Rakkam Sangma bad u myntri ka tnad bording u Abu Taher Mondal bad kiwei.
Ia kane ka skulbah la tei ha ka jinglut kaba T.16.96 klur ha u snem 2018.
Ka sorkar ka la ai nam ia kane ka skulbah ha u myntri rangbah ba nyngkong ka jylla u Captain Williamson A Sangma.
Ha u snem 2011, la seng kum ka Captain Williamson Sangma State Technical University ban pyniasoh ia ki college ha ka jylla hynrei ha 2022, ka sorkar ka la jer kyrteng thymmai kum ka Captain Williamson Sangma State University, ban pynthikna ba baroh ki Technical bad ki Non-technical college kin lah ban pyniasoh bad kane ka skulbah, khlem da donkam shuh ban leit pyniasoh bad ki skulbah jong ka sorkar pdeng.
Haba kren ha kane ka sngi, u myntri rangbah u Conrad u la jer ba kane ka sngi ka dei kaba khraw ia ka jylla namar ba ym ba kan ai ka jingpule ha ki kyrdan kiba shalor hynrei kan kyntiew ruh ha ki kam wad bniah bad ki buit thymmai ban wanrah ka jingkylla haka pule puthi ha ka jylla.
U la ong ba ha kine ki 50 snem, ka jylla kam shym la don ka skulbah la kajong bad ka jingseng ia kane ka skulbah jong ka jylla kan ieng kum ka nongmuna ban kyntiew ia ka pule puthi ha ka jylla.U Conrad ula pynbna ruh ba ka sorkar kan plie noh sa ia ka Shillong Campus jong kane ka skulbah ban pynsuk ia ka rukom treikam bad ia ki samla pule na rilum Khasi bad Jaintia.
Lyngba ka jingdon ka skulbah la kajong, ki college ha ka jylla ki lah ban jied shanjo ban leit pyniasoh bad kito kiba pyniasoh bad ka skulbah jong ka jylla, kim donkam shuh ban ialeh ia ka Common University Entrance Test (CUET) ban rung klas ha under-graduation bad post-graduation courses ha ki colleges kiba iasoh bad ka Captain Williamson Sangma State University. Ka CUET kan treikam ia ki college kiba pyniasoh bad ka North Eastern Hill University (NEHU), Shillong kaba dei jong ka sorkar pdeng.
Kiwei kiba kren ki long u symbud myntri rangbah u bah Sniawbhalang Dhar, u myntri ka tnad pule puthi u Rakkam A. Sangma bad u Speaker u Thomas A. Sangma bad kiwei.
La ioh ruh ia ka jingkren na ka Prof. Vasanthi Vijayakumar, kaba dei ka Vice Chancellor jong ka Captain Williamson Sangma State University bad kumjuh na u Commissioner and Secretary ka tnad pule u Vijay Kumar Mantri.
Ha kane ka sngi, la sakhi ruh ia ka jingthoh na ki bor college kiba kwah ban iasoh bad kane ka skulbah kiba kynthup ia ka Williamnagar College, Williamnagar, Captain Williamson Sangma College, Baghmara, Rongjeng Model College, Rongjeng, Ampati Degree College, Ampati, PA Sangma Abong Noga College, Tura, Mason Philips Academy, Tura, Mirriam Rural Women’s College bad ka Tura Christian College.
Ia kane ka skulbah la ithuh da ka University Grants Commission (UGC) katkum ka section 2(f) ka UGC Act 1956 ha 6 tarik Nohprah, 2024.
Kane ka skul bah ka dei ka business Jong u conrad bad kiwei de ki IAS ba kamai pisa
Kumno ha shillong ba long kum ka city ym lah ban ai skul bah pynban u myrsiang u rah lud Kat ka ba dei trai na ri khasi sha coro
Ka mut nangne sha khmat lada donkam haki laiñ pule (pule) ka headquarters ka dei sha garo, ha Shillong ym lah leh ei2 re heh tang ka kyrteng ka kam pat sha garo lut, ko! ki! paidbah Khasi sa ia pyrkhat hi maphi mo, kumno kan long?.
Sah kale kale kale le sah kale3.