Sha u DC buh jingthoh ka HITO, ba lum pisa na ki kali kit syiar

Nongpoh:Ki nongialam ka Hynniewtrep Integrated Territorial Organization (HITO), ia kaba la ialam da u samla Shanniah Nongrum, President ka HITO ha Ri Bhoi, mynhynnin ka sngi, ki la leit ban buh jingthoh sha u Deputy Commissioner ka Ri Bhoi bad kata ka long ban dawa na u ba u dei ban tuklar mardor bad ban phah sangeh noh mardor ia ka kynhun ki briew, kiba ju lum pisa beain na ki kali kit Syiar, kiba wan na kiwei ki jylla ban pynpoi sha Meghalaya.

Lyngba jong katei ka sngi, ba ki nongialam ka HITO ki la leit ban buh jingthoh sha ophis u DC Ri Bhoi, kaba nyngkong jong ka jingthmu jong ki, ka long ban leit kynduh syndon ia u DC, khnang ba kin ioh iakren markhmat sha u, hynrei namar ba u DC um don ha karma treikam, kaba la pynlong ia kitei ki nongialam ka HITO, ba kin shuh phah noh sha u lyngba ka jingthoh.

Haba kren sha ki lad pathaikhubor, u samla Shanniah Nongrum, u la ong ba ka seng ka sngewkhia eh halor katei ka jingmih ka kynhun kaba lum pisa na ki kali kit Syiar, ha kaba kino kino ki kali kit Syiar kiba la dep ban siew pisa sha kata ka kynhun, kaba mut ba ki Syiar kin poi beit sha Meghalaya, khlem da tip pat ba ki dei ki Syiar kiba kumno, la ki dei ki Syiar ba pang ba shitom ne ki Syiar iap ruh kumjuh.

U la ong ruh, ba lada u DC Ri Bhoi um leh eiei bad ba lada katei ka kynhun kaba lum pisa beain na ki Syiar kam sangeh, na ka liang ka seng kam banse ban shim da ki sienjam kiba kham tyngeh ne wat ban hiar hi dalade sha ka jaka ba kitei ki kynhun nonglum pisa beain na ki kali ki Syiar, ki ju bat ban shim pisa na ki kali kit Syiar.