Pan jingshai u Bah Lambor na u CEM ba thaw shnong thymmai ia ka Mawsaw

Shillong:U MDC ka Nongkrem u bah Lambor Malngiang ula pan jingshai na u CEM ka KHADC bah Pyniaid Sing Syiem halor ka jingthaw shnong thymmai ia ka Mawsaw kaba la wanrah ka jingpyrshah na ka Umphyrnai bad ka Ur Masi U Joh.

Dang shen, ki ar dorbar shnong kata ka Umphyrnai bad Ur Masi U Joh kila pyrshah ia ka jingthaw shnong thymmai ia ka Mawsaw da ka Khasi Hills Autonomous District Council (KHADC).
Haba kren sha ki lad pathai khubor, u Bah Lambor u la ong ba ïa katei ka jingpynjari hukum thaw shnong thymmai ia ka Mawsaw la soi da u Bah Pynshngain N Syiem ha ka por ba dang dei u Deputy Chief Executive Member ka Council ba khmih ia ka tnad Elaka.

U la ong ba katkum ka KHAD (Administration of Elaka) Act, 1991 ka KHADC ha ka Section 3 ka kdew, ban thaw shnong thymmai donkam ka jingmynjur ka shnong kmie bad na ka liang jong u un sa ïakren bniah bad ki ar dorbar bad kumjuh bad u Syiem ka Hima Khyrim halor kane ka kam.

Kum ban shu kdew ba ha ka 07 tarik u Kyllalyngkot, 2025, u Bah Pynïaid haba kren sha ki lad pathai khubor halor ka jingpyrshah kitei ki ar shnong, u la ong ba mar ia ïohi ia ki jingkynnoh u la wad bniah na ka Council ha kaba la shem ba ka jingpan shnong da ka Kur Kharkongor ka dei kaba naduh u snem 2016 da kaba bynrap ba ka kam bishar ka dei ha ka Council.