Sngap jar jar ka KHADC, ba pyndonkam bakla ia ka song pisa sorkar Pdeng

Shillong:Ka Khasi Hills Autonomous District Council (KHADC) ka la sngap jar halor ka jingpyndonkam bakla ha ka jingpyntreikam ïa ka song pisa (Grant) kaba la ïoh na ka sorkar pdeng.
Ïa kane la pynpaw da ka Comptroller and Auditor General of India (CAG) ha ka kaiphod jong u snem ba kut ha u Lber 31, 2019.
Ka la pyntip ba ka sorkar India ha ka hukum, ka la bthah ba dei ban aiti ïa ki Utilisation Certificate (UC) hapoh 12 bnai naduh ka sngi ba la pyllait ïa ka bhah tyngka katkum ka GFR 2017, ka sorkar Meghalaya ka la pyllait ïa ka song T. 32.25 Klur sha ka KHADC ha ka 28 tarik u Nohprah 2017.

Ka CAG ka la shem ba na ki 35 tylli ki projek kiba la mang, ka KHADC kam pat lah ban pyndep ïa ka jingtei ïa ka ‘Traditional Cultural Centre ha Umïam, Jingkieng Kalong’. Ka jingbhah tyngka ïa kane ka projek ka kot sha ka T.7.50 Klur ha kaba ka KHADC ka la pynlut haduh mynta haduh T.5.87 Klur da kaba iehnoh sharud ïa ka pisa kaba sah kaba ym pat pynlut kaba long T.1.63 Klur.
Ha ka jingkhmih bniah ïa ki kot ki sla, la pynpaw ba ka KHADC ka la aiti ïa ka UC kaba kot T.32.09 Klur ha u risaw 2018 haduh u Rymphang 2021, da kaba iehnoh ïa ka UC kaba dang sahteng kaba long T. 0.16 Klur.
Kitei haneng ki pyni ba ka KHADC ka la aiti ïa ka UC kaba kot T. 1.47 Klur (T. 1.63 – T.0.16) hashwa ban pyndonkam ïa katei ka grant. Nalor kane, la shem ba na ka jingaiti ïa baroh ki UC, ka UC kaba kot T.21.69 Klur la aiti hadien ka jingpynslem kaba naduh 17 haduh 788 sngi kaba long palat ïa ka por kaba la buh, ka kaiphod ka la pynpaw ba ka daw jong ka jingslem ha ka ban aiti ïa ka UC, kata ruh hashwa ban pyndonkam ïa ka Grant kaba kot T.1.47 Klur kadei ka bym shym la don ha ka rekod.

Halor ka jingkdew jong ka Audit, u Secretary jong ka Executive Committee, KHADC ula pynpaw (Nailar 2022) ba kam shym la don kano kano ka jingpynlut pisa ha u snem 2017-18 na ka Grant kaba T. 32.25 Klur. Hynrei ka Council ka la shu sngap jar halor ka jingpyndonkam bakla ïa ka rukom pyntreikam ïa ka Grant kaba ka la ïohpdiang. Ka Council ka donkam ban thaw ïa ki kyndon aiñ kiba paka ha ka ban ai kontrak ïa ki kam ban lait na kano kano ka jingpyndonkam bakla ha ka jingai ïa ka kam kontrak kumba la kdew da ka Audit, la pynpaw.