“Halor ka khubor pynduh tiket ha Nongstoin” ong u heh duh ka VPP, ba dei ka khubor thok jong ka Batesi TV

Shillong: Dang kumba ar taiew mynshuwa, ka Batesi TV ka la pynmih ia ka khubor ba u kyrtong ba ka Voice of the People’s Party u ban ia khun ia ka elekshon MDC sha ka Khasi Hills Autonomous District Council na Nongstoin konstitwensi u bah Marbiang Nongsiej u lah ban shah pynduh tiket noh ha ka Party jong u ka VPP.

Kane ka khubor ka la pynbitar lep ia u President rangbah jong ka VPP u bah Ardent Miller Basaiawmoit, u la thoh ruh ha ka Whatsapp Status jong u da kaba ong ba ka Batesi TV ka dei ka Fake News lane ka khubor thok bad u la kynthoh ruh da kaba ong ba ka dei ka Paid News lane ka lad pathai khubor ba la siew pisa dano re dano.
Hynrei mynta kane ka khubor ba ka Batesi TV ka la dep ban pyllait kham mynshuwa ka la urlong bad da shisha u kyrtong ka VPP na Nongstoin u la shah pynduh tiket bad ia ka tiket mynta la ai sha u Dr.Juristman iawphniaw. Ka VPP ka la pynbna ia kane ka jingbujli kyrtong ha ka 7 tarik u Kyllalyngkot 2025 bad ia kane ka jingpynbna la soi da u Secretary jong ka State Election Committee u Dr.Londoner M Sohtun.
Kum ban shu pynkynmaw ba ha ka Whatsapp Status jong u bah Ardent u la byrngem ruh ba un tan ia ka Batesi Tv sha ka Press Council of India da kaba kynnoh ba ka ai khubor thok hynrei mynta kine ki jingshisha kiba ki nonglum khubor ki la ioh ki la paw pyrthei bad ka la urlong shisha.

Ki lad pathai khubor kim dei kiba don ha kano kano ka liang hynrei ki thoh bad ki pynmih ia ki khubor katkum ki jingtip kiba ki la ioh lum bad ka shong ha ki paidbah mynta ban bishar , hato ka dei ka jingbakla jong ka Batesi Tv ne ka dei ka jingpyrshang jong u President ka VPP ban ialam bakla ia ki paidbah lyngba ka jingthoh Status jong u.