Plie paidbah u MP Rajya Sabha ia ar-tylli ki surok iaid kali ha Lawbyrwa

Nongpoh:U Dr. W.R Kharlukhi, MP Rajya Sabha ka NPP, mynhynnin ka sngi u la leit ban plie paidbah ia ar-tylli ki surok iaid kali, kata ka surok na Umiarong sha Lawbyrwa bad kumjuh ruh ka surok na Lawbyrwa sha Dong Manai, ia kaba ia kitei ki surok la shna lyngba ka jingpynmang tyngka na ka sorkar jylla bad kaba la kot sha ka T. 1.37 klur.

Haba u Dr. W.R Kharlukhi, u la leit ban plie paidbah ia kitei ki surok, la sakhi da ka jingdon u Bah D. Laloo, Executive Engineer ka PWD Roads, Umsning Division, nangta u Bah R. Kharkrang, Rangbah Shnong ka Lawbyrwa lem bad kiwei.

Lyngba jong katei ka sngi, ba la lah ban plie paidbah ia kitei ki ar-tylli ki surok iaid kali, na ka liang u Dr. W.R Kharlukhi, u la ong ba ka jinglah ka sorkar ban pynmang tyngka na bynta ban shna pynbha ia kitei ki surok, ka la long shisha kaba la ai jingmyntoi eh ia ki paidbah ha katei ka thain bad kiba pyndonkam ia kitei ki surok, ba kin suk ha ka leit ka wan.