Dawa bai lutksan T.10 lak marwei & pynshitom ia ki shipai

Shillong, 1 Nohprah:
Kumba 3000 hajar ngut ki paidbah ki la wan ban ia shim bynta ha ka jingialang paidbah kaba la long mynta ka sngi ha Kharkutta, North Garo Hills kaba dei ka jing ialang ban pyrshah ia ka jingshah siat iap ki 2 ngut ki briew kiba lui lui ha ki shipai. Ha katei ka jing ialang ki paidbah ki la deng da ki lama iong ban pyni ia ka dak ka jing pyrshah jong ki. Katei ka jingialang paidbah ka la long ha Kharkutta Mini Stadium, ki paidbah ha katei ka jaka ki la dawa na ka sorkar ba ka dei ban pynshitom ia ki shipai kiba la siat ia ki ar ngut bad ki la pynpaw ba kim kwah ia ka jingtohkit Majistor namarba ia katei ka jingjia la kam hi da ki shipai bad ki dei ruh ki shipai kiba la leh ia katei ka kam. Kipaidbah ha katei ka jingialang ki la ai por 15 sngi ia ka sorkar ba kan pynshitom ia ki shipai ba donkti lym kumta ki la pynbna ba kin pynlong da kiwei pat ki jingiakhih kiba kham tyngeh.
Lah ban pynkyn maw ba ha ka sng balang jong ka taiew ba la de par ngut ki samla u Alphius Momin uba dei u nong hikai skul bad u Sweetbirth Marak baroh ar ngut na ka shnong Rajasimla ki la shah siat iap ha ki shipai ha ka shnong Konchikol kaba don hajan Kharkutta namarba kim shym la sangeh ia ka thuk thuk jong ki ha ka por ba ki shipai ki dang talasi , bad ki shipai ki la kem ba ka dei tang ka jingbakla. Haba kren sha ki nongthohkhubor ha katei ka jingialang u nongialam ka GSU u Rupa Marak u la ong ba kam donkam ia ka jingtohkit Majistor namarba ia katei ka jingjia la dep tip shai ba la leh da ki shipai kaba ki la kam hi –hi ruh hynrei kaei kaba ki paidbah ki kwah mynta ka dei ba kito ki shipai kiba donkti ban siat ki dei ban sha pynshitom. Katei ka jingialang ka la dawa ruh ba ka sorkar ka dei ban siew bai lutksan mardor kaba mar T.10 lak tyngka sha ki bahaing jong kitei ki 2 ngut. Ki la dawa ruh na ka sorkar jylla ba ka dei ban weng noh ia ki shipai na khappud ka Assam bad Meghalaya.Haba kren paidbah ha katei ka jingialang u MLA ka Kharkutta u Cherak Momin u la ong ba wat ka AFSPA ruh kam ai bor ia ki shipai ba kin thom naphang ha kane ka jylla khlem da pyntip sha ki pulit , “ Kane ka dei ka sien kaba ar kaba la jia ha Kharkutta mynta u snem” u la ong bad u la pynkynmaw ruh ba dang ha u bnai lber mynta u snem ki shipai ki la siat iap 2 ngut ki lui lui ha Kharkutta. Ka jingdawa ba la pynsngew paidbah ha katei ka jingialang ka long ban pynshitom ia ki shipai ba donkti bad ka T.10 lak tyngka ka bai lutksan sha kiba haing.
Halor katei ka juh ka phang ka Garo Hills state Movement Committee ( GHSMC) ka la dawa ba u myntri ka sorkar pdeng uba peit ia ka kam iada ri u dei ban tuklar ia ka jingshah siatiap ki ar ngut ha ri Lum Garo bad ban thung da ki bor tohkit ba laitluid ia katei ka jingjia bad ban pynshitom ruh ia ki shipai kiba donkti katkum ka aiñ.