Ka Ïingmane kam dei ka jaka pyrta Jai Shree Ram, ong U President KSP

Shillong:U President ka Kutumba Surakshya Parishad (KSP) Satya Ranjan Borah ha ka sngi Thohdieng ula ong ba ki Ïingmane kim dei satia ki jaka ban ong “Jai Shree Ram”.

Haba kyntu ïa ki paidbah ban burom ïa baroh ki jait niam, u Borah ula ong, “Baroh ki don ïa ka hok ban im, ban mane blei bad ka hok ban pynpaw ïa kaba ki sngew bad nga sngew ha kajuh ka por ba namar ka Ri India ka dei ka Ri ba burom ïa baroh ki kam, baroh ki dei ban burom ïa ki niam bapher bapher bad ki Jaidbynriew. Ki Ïingmane kim dei na ka bynta u Jai Shree Ram.

Ula kynthoh ïa kane halor ka jingjia ba dang shen ha Ïingmane ha Mawlynnong ha kaba uwei u nong jngohkai ula pyrta ‘Jai Shree Ram” hapoh ka Ïingmane.
“Ki hap ban burom ïa ki Ïingmane bad ki Ïingmane ruh ki hap ban burom ïa ki Mandir, ki Temple bad ki hap ban burom ïa ngi ruh namar ka jingïaburom kam dei ban wan tang na shiliang,” ong une u Nongïalam ka seng Hindu.