Ka suk bha ban shu thaw seng sain pyrthei, ban pynshongshit ia u paidbah: Paul

U Working President ka UDP u bah Paul Lyngdoh ula kren pharshi ia ka seng Voice of the People Party (VPP) da kaba ong ba ka long kaba suk ban shu thaw seng sain pyrthei, ban pynshongshit ia u paidbah.
Haba kren mynta ka sngi, u bah Paul u la ong ba ka jingjop elekshon kam kut tang hangta hynrei kaei kaban wan shakhmat pat na ka bynta ki paidbah bad ka jylla.
“Ka suk bha ban shu thaw seng sain pyrthei, ban pynshongshit ia u paidbah hynrei ha kaba khadduh, ki paidbah ki hap ban peit hadien ba la dep rwai dep shad ha surok, ki khun kin ioh kam nangno, ka ioh ka kot, ka jingeh ka imlang sahlang, hato ngin shu iakhun tang da kaba shu rwai shu shad ha surok. Ha ka sain pyrthei, ka donkam ban don ka pasoh ban iasaid bad lada kam don ka pasoh, ka long kaba eh ban pynneh ia kano kano ka party”, la ong u bah Paul.
Ha ka elekshon, ym lah ban khein sting iano iano hynrei ka thong ka dei beit ban jop. U la ong ba ka elekshon MP ka iapher bha ha kaba ki briew ki pyrshah ia ki kyrtong kiba don ha ka liang ka sorkar hynrei mynta kila iohi kaei kaba la jia, ha kaba ka la don ka jingiapher jingmut ha kawei ka seng sain pyrthei (VPP), bad ki briew kila iohi ia ka jinglong ba shisha jong ki party bapher bapher wat tang ha kine ki khyndiat bnai.
Ha kajuh ka por, u la ong ba ka jingiakop kaba khraw kam dei bad uno uno u kyrtong hynrei ka dei ha ka party kumno ban trei bad kaei kaba lah ban leh.
“Kyrmen skhem ba ki paidbah ha kine ki bnai ba la dep, kila iohi ia ki rong ba shisha jong ki seng sain pyrthei bapher bapher”, la ong u bah Paul.
U la ong ba kane kam dei ka drama kaba neh tang lai kynta hynrei ka dei ka jingiakhun kaba la neh da ki snem.
Ha kaba iadei bad ka Jaiaw-Mawprem konstitwensi, u bah Paul u la ong, “Ha Jaiaw konstitwensi, ngi ialeh pyrshah uwei ia uwei pat ha ka elekshon kaba la dep hynrei mynta ngi la long kawei bad lada khein lang ia ka vote jong nga bad ka vote jong u bah Auguster Jyrwa, ngi la tam lypa 70 percent”, la ong u bah Paul.