Yn khot jingialang ka DC namar ka jingdawa lehniam ha Krem Mawjymbuin

Ka Deputy Commissioner ka East Khasi Hills District, ka kong RM Kurbah kan lum da ka jingialang jong ka District Level Committee ha ka 3 tarik Kyllalyngkot 2025 ban iakren halor ka Krem Mawjymbuin kaba don ha Mawsynram.

Ka Deputy Commissioner, kaba long ruh ka Chairperson ka District Level Committee ka la khot ia kane ka jingialang ban iakren halor ka jingdawa ban iaid yatra da ki kynhun niam Hindu sha ka Krem Mawjymbuin kaba don ha ka shnong Mawsynram.

Ka DC ka la phah ruh da ki shithi sha ki heh ophisar ki ba don bynta bad kane ka mat kynthup ia ki rangbah shnong, ki nongialam ka dorbar shnong ka Hima Mawsynram, u general secretary ka Central Puja Committee bad kiwei de.

     Lah ban kdew hangne ba na ka liang ka seng niam Hindu ka Kutumba Surakshya Parishad (KSP) na Assam ka la byrngem ban pynlong da ka jingiakhih ha Byrnihat ha ka 24 tarik Nohprah namar ka jingbym shimkhia ka District Level Committee halor ka jingdawa ban ailad ban pynlong ka jinglehniam ha Krem Mawjymbuin.

    Ha shwa kane na ka liang ka KSP ka la ai por haduh 23 tarik Nohprah ia ka DLC ban ba kan pynbeit ia ka jingialang bad baroh ki kynhun kiba don bynta bad ka Krem Mawjymbuin.

   Haba phai sha ki nongialam shnong ka Mawsynram ki la pynpaw ia ka jingpyrshah kaba jur ban pynlong ka jinglehniam ha ka Krem Mawjymbuin.