Yn iakhun lut ha baroh ki konstitwensi, pyrshah ia ka VPP, UDP, NPP: Pala

U President ka Congress Meghalaya u bah Vincent H Pala ula ong ba ka thup kyrteng jong ki kyrtong MDC sha KHADC bad JHADC yn sa pyllait ha ka taiew ba nyngkong u Kyllalyngkot ban wan.
Ka Congress kala pyllait ia ka 26 ngut ki kyrtong ha ka thup ba nyngkong ba kynthup 15 sha KHADC bad 11 sha ka JHADC.
Haba kren mynta ka sngi, u bah Pala ula ong ba ka party ka la pynkhreh bha ia ka elekshon sha KHADC ha kaba ka la ai jinghikai ruh ia ki kyrtong namar ba kiba bun kiba dang thymmai. Ula ong ba kum u President ka MPCC, ula peitngor bha man ka sngi ia ka jinglong jingman jong ki konstitwensi, ha kaba ki don ki jaka ba ki kyrtong ka Congress ki iakhun pyrshah ia ka VPP, don kiba ka ialeh pyrshah ia ka UDP bad kumjuh ia ka NPP.
Ula ong ba ha kane ka kynti, ka Congress ka iakhun pyrshah ia baroh ki kyrtong na kiwei ki party ym kum kiwei kiba iakhun kyntoit kyntoit.
“Nga la peitngor bha jan man ka sngi iaka jinglong jingman ki konstitwensi, bad katkum ka jingtip, ka Congress ka iakhun ha baroh ki konstitwensi, don kiba ialeh bad ka NPP, bad ka VPP, bad ka UDP”, la ong u bah Pala.
Ka elekshon sha KHADC bad JHADC kan long ha ka 21 tarik Rymphang 2025 bad ka jingpynbna kan long ha ka 24 tarik ha ujuh u bnai.