Lah ban iakhun MDC biang u MLA barim ka Sohiong na NPP

Ka jingbat shwa ka NPP khlem pat pyllait ia ka kyrteng u kyrtong na Sohiong wat haba la don u MDC, ka la wanrah ka jingmutdur ha ki paidbah ba ka party ka lah ban jied da uwei pat ban iakhun.
Katkum ka tyllong khubor, la ioh jingtip ba ka don ka jingthmu na ka party NPP ban phah iakhun biang ha u bah Samlin Malngiang ha kane ka elekshon MDC kaban sa wan sha KHADC. U bah Samlin u la jop MDC teng na Sohiong shwa ba un jop ia ka MLA ha 2018 hynrei ula shah rem noh ha ka 2023.
Ha ka jingshisha, u NPP ka don u MDC ba mynta u bah Sherbor Mawlong uba phet na ka HSPDP sha ka NPP hynrei la ioh jingtip ba ka party ka lah ban ym ai ticket shuh ia u. La sngewthuh ba na ki dak ki shin, ka NPP ka lah ban phah iakhun biang ia u bab Samlin lada jia ba kam don kano kano ka jingpynbeit da kumwei pat.
Lada jia ba iakhun u bah Samlin, ka elekshon MDC ha Sohiong kan long kaba shongshit bha namar ba u khun u bah HDR Lyngdoh bam kwai ha duwar u Blei, u bah Nathaniel Rymbai u iakhun na ka Congress, katba u bah Synshar Kupar Lyngdoh uba dei pyrsa u bah HDR Lyngdoh u dei u MLA na ka UDP.