Lahduh ka Lamyrsiang ha ka lympung ïalehkai ka SBSA

Ka Lamyrsiang SC ka la long ka lahduh ha ka lympung ïalehkai photbol Super Division jong ka Saipung Block Sports Association (SBSA), da kaba ka la lah ban pynliem ïa ka Pyrdung SC da 4-2 kol ha ka jingïashut tie Breaker, ha ka jingïalehkai kaba la long ha kane ka 20.12.2024.
Haba phai sha ka jingïakhun ka la long kaba itynnad bad kaba mar ïa biang bor na baroh ar tylli ki kynhun. Hynrei ha ka minit kaba 9 jong ka jingïakhun ka Pyrdung SC ka la ïoh ban pynkhih ïa ka jar lyngba u Phrangsngi Pakma. Hadien kane na ka liang ka Lamyrsiang SC kaba la ïakhun tyngeh ban siew ïa katei ka kol, kumta ha por shwa ban kut ka ka por jong ka jingïakhun kata ha ka minit kaba 90 ka Lamyrsiang SC ka la ïoh ban siew ïa katei ka kol lyngba u Jefferson Surong, kumta ka jingïalehkai ka la poi sha kaba kut bad la bteng da ka jingïakhun sa da ka Extrra Time, hynrei ha kane ka Extra Time ym shym don ba la ïoh ban thep kol ne pynkhih jar, kumta ka jingïalehkai ka la poi sha ka jingïashut Tie Breaker, ha kaba ha kane ka jingïashut tie Breaker ka Lamyrsiang ka la ïoh ban thep 4 kol katba ka Pyrdung SC 2 kol, ha kaba ka Lamyrsiang SC ka long ka lahduh mynta u snem ha kane ka lympung.
Ka lahduh ha kane ka lympung ka la ïoh ban rah ïa ka song pisa kaba 50 hajar tyngka, katba ka kynhun kaba wan ba ar ka Pyrdung SC ka la ïoh ban rah ïa ka song pisa kaba 30 hajar tyngka ryngkat ki trophy.
Ha kane ka sngi la sam ruh ïa ka khusnam Player of the Tournament kaba la ïoh da u Lissus Suja na ka Lamyrsiang SC, Top Scorer of the Tournament sha u Sehgouthang Tuboi na ka Mulait United, Best Goal Keeper Keeper la ïoh da u Sbing Chyrmang na ka Pyrdung SC bad ïa ka nam Player of the Match sah u Share Mukhim na ka Lamyrsiang SC.
Ïa ki khusanm la sam da u kongsan ma Francis Swer ha ka jingïadonlang President SBSA, u Dominic Pala, Victor Suja, Working President ka EJHDFA James Sutnga lem bad ki dkhot ka SBSA bad kiba shah khot sngewbha.