Ka khubor shaphang ki sngi kiba khatduh bad ka jingrongnoh (rapture), ka dei kawei na ki daw kaba pyndkoh bad pyntlot ia ka jaidbynriew jong ngi!

Badapjied Kurkalang

Bynta 1
Da ka mynsiem kaba sngewkhia ngam lah khlem da thoh bad pashat jingmut lem sha phi ha kaba iadei bad kane ka bynta kaba nga shem ba ka long kawei na ki daw kaba la pyndkhoh bad pyntlot ia ngi kum ka jaidbynriew. Hooid, nga hap ban pyntip nyngkong duh ba kane ka khubor ka dei kyrpang na ka bynta ki riewngiet Khristan kiba don ha kane ka ri bad jaidbynriew jong ngi.

Kaei kaba nga thoh hangne ka lah ban long kaba phylla lane kaba pynkhuslai jingmut lane kaba pynpyrkhat ia phi kiba pule. Ka daw kaba nga thoh ka long ba ngam shim la thoh ban pynsngewbha iano iano hynrei nga thoh beit katba kum ka jingshisha lyngba ki jingpule bad jingwad jong nga. Hynrei ka dei ka kamram jong phi pat kiba pule ban puson bad pyrkhat, kano kaba shongnia bad shong nongrim ha kaba kut ban shim ia ka rai.
Hooid, ngam lah ban thoh lut ha kane ka artikl ia ka jingshisha bad ki sakhi satar ha kaba iadei bad ka jingshem bad ka jingwad jong nga ha kane ka bynta. Tangba ia kiba kwah ban tip bad wad kham bniah, phi lah ban pynioh ia ka kot kaba la pynkylla na ki jingthoh jong ki nongthoh histori kiba pher bapher kiba kren bad ai jingshai halor kane ka bynta. Nga ngeit lada phi pynioh ia ka kot ka ban dang mih kan pynkylla ia ka rukom pyrkhat jong phi kumba ka la pynkylla ia ka rukom pyrkhat jong nga.

Nga ngeit ba baroh ngi la ia heh ia san bad iohsngew ia ki khubor shaphang ka jingwai noh ka pyrthei (end of the world) ne ka jingrongnoh (rapture) kaba ong kumne, mynta ngi im ha kita ki sngi kiba khatduh bad ka jingronghnoh ka la hajan eh. Ngi la im ryngkat bad kane ka rukom pyrtkhat naduh dang rit haduh ba ngin da heh. Kam pher phi wan na kano kano ka Balang bad ki Balang ki lah ban don ka jingiapher ha kiba bun ki bynta ha ki jinghikai jong ki, hynrei ha kaba iadei bad ki khubor jong ka sngi kaba khatduh (eschatology) kam don satia kano kano ka jingiapher. Baroh ki don ia ka juh ka rukom peit bad pyrkhat ha kaba iadei bad kita ki sngi kiba khatduh (eschatology).
Ngi ju iohsngew ruh na ki nongkren jong ki Balang bad riewshimet kiba kren shaphang kita ki sngi kiba khatduh bad ka jingrongnoh, kiba ong, ba hashuwa ka jingwan U Jisu kan don kata ka jingpynshitom kaba khraw ha kane ka pyrthei (Great Tribulation) hynrei kane ka jingpynshitom kan ym hap halor ki riewngeit Khristan kiba shisha namar U Blei yn wan ban rongnoh (rapture) ia ki. Ki ban shah pynshitom kin long tang kito ki bymngeit bad ha kaba khatduh U Blei yn wan ban pynjot shisyndon ia kane ka pyrthei baroh da ka ding. Nga ngeit baroh ngi la long mlien ban iohsngew ia kum kine ki khubor na ka por sha ka por.

Lada phi long ki Khristan kiba pyrkhat, kaba phi dei ban long, phin da sngew phylla ban iohsngew ia ki jingkren jong ki nongsharai Balang bad ki riew shimet kiba ialap namar kaei kaba ki ialap ka long pyrshah ia kaei kaba ki kren. Lada phi sngap bha ia ka jingkren ne jingialap jong ki, ki ong kumne, to ngin duwai na ka bynta ka ri bad ka jaidbynriew ba U Blei un isynei ban pynim, pynbha bad thaw thymmai ia ngi kum ka jaidbynriew. Hynrei, ha kawei pat ka liang ki ong kumne, mynta ngi im ha ki sngi kiba khatduh bad ka jingwan U Jisu ka la jan bad ngi dei ban pynkhreh na ka bynta ka jingrongnoh bad kaei ka ban bud ka long ka jingbishar U Blei bad ka jingpynjot ia ka pyrthei baroh kawei da ka ding.
Hynrei kane ka dei ban pynlong ia ngi ban kylli, lada U Blei un wan ban pynjot ia ka pyrthei baroh kawei da ka ding, kumba ki ong, te balei duwai bad khmihlynti ia ka jingpynbha, ka jingpynkhie im bad jingpynthymmai ia ka ri bad ka jaidbynriew? Ngi hap ban jied tang kawei na kane, la ka dei ba U Blei un pynbha lane pynjot ia ka pyrthei. Ngim lah ban ong ba baroh ar tylli ki jingmut ki long kiba dei. Bad kaei kaba mih nangne ka paw bad ka pynlong ruh ia ngi ban kylli, hato U Blei jong ngi U long U Blei uba kylla khlieh khlieh kylla tdong tdong?
Lada U Blei un wan ban pynjot ia ka pyrthei baroh kawei, hato kan myntoi aiu ia ngi ban pyrshang ban wanrah ia ka jingkylla ha ka ri bad ka jaidbynriew jong ngi? Ka mut ki jingpyrshang jong ngi baroh ki long tang kaba shuh leh tynneng bad ha kaba kut kam don satia kano kano ka jingthmu. Hato kumno ngi long kiba iapher na kiwei pat ki jaid niam bad jingngeit kiba don ha kane ka pyrthei? Ym don kano kano ka jingiapher, lait noh tang ha ka bynta jong ka jingpynim.

U Blei U hikai ia ngi ban duwai kumne, “to wan ka Hima jong me ha khyndew kumba ha bneng.” Hangne U Jisu ym shym la hikai ia ngi ban khmihlynti ba ka hima jong U kan long ha bneng, hynrei ka hima jong U kan long ha kane ka khyndew. Ngi duwai ia kane ka jingduwai da ki hajar sien tangba balei ngim iohi satia ia ka hima jong U ha kane ka pyrthei? Kaei ka daw? Ka daw ka dei namar ngim ju iohsngew ia ka khubor kaba pura shaphang ka Hima U Blei bad kaei kaba ngi iohsngew ka long tang ka khubor jingpynim. Ka khubor shaphang ka Hima U Blei ka la jah na ka Balang da ki spah snem mynta bad ainguh ia U Blei ba ngi lah ban ioh biang ia kane ka khubor ha kine ki por jong ngi kiba mynta. Phi donkam ban ioh ia kane ka jingpynpaw namar lada phim ioh ia kane ka jingpynpaw phin ym tip ia ka jingthmu kaba U Blei u buh ia phi ha kane ka pyrthei, namar ka jingthmu U Blei ia ngi kam kut tang ban ioh jingpynim.
Namarkata kaei kaba ngi pyrkhat ha kaba iadei bad ka lawei jong ka pyrthei ka ktah ruh ia ka rukom pyrkhat jong ngi kumno ngi im ka jingim kaba man ka sngi. Ka pynlong ruh ia ngi ban pyrkhat tang ia kaba mynta bad ngim lah kein ban pyrkhat jngai ia kiei kiei baroh namar ka pyrthei ka la jan wai. Ka long ka jingshisha, kumno ngi peit ne pyrkhat ia ka lawei jong ka pyrthei ne ia ka ri bad ka jaidbynriew kan ktah ban pynkylla ia ka jingmut jingpyrkhat jong ngi. Lada kaei kaba ngi tei bad leh kan neh haduh ka jingwan kaba khatduh U Jisu nga ngeit ba ka jingpyrshang jong ngi ka don jingmut kein. Lada kam long kumta, ngin ym sngew lyngngoh balei ba ka ri bad ka jaidbynriew jong ngi ka hiar haduh katne katne. Ka Proverb ruh ka pynkynmaw ia ngi, kumba u briew u pyrkhat kumta ka pyrthei jong u ruh kan long.

Tang ban shu pynkhih ia ka jingmut jingpyrkhat jong phi. Kumno lada nga ong ia phi ba kaei kaei baroh kaba phi leh ha kane ka pyrthei kan iai sah junom? Ne kumno lada phi tip ba U Blei yn ym pynjot ia kane ka pyrthei bad kumjuh ruh ia kane ka ri Khasi jong ngi? Nga ngeit lada ka long kumta, ka rukom peit jong phi ia kane ka pyrthei bad kaei kaba phi leh ban wanrah ia ka jingkylla ha ka ri bad ka jaidbynriew kan long kaba pher ban ia kaei kaba phi juh pyrkhat baroh shi katta. Kane kan pynkylla ia ka rukom pyrkhat kumno ngi peit ia ka mariang bad sdang ban sumar ia ka kumba U Blei U kwah ia ngi ban sumar. Bad kane kan pynkylla kumno ngi peit bad leh halor ka synshar khaddar, ka ioh ka kot, ka pule puthi, ka ioh kam ioh jam, ka khuid ka suba bad kiwei kiwei de, kiba don ha ka imlang sahlang. Ka pyrthei jong phi kan long kaba pher na kaei kaba phi juh pyrkhat.
Wat kyrkieh ban ong ia nga ba nga long la uba lamwir ban kren kumne namar kaei kaba nga shem kam long kaei kaei kaba shu wan jia kynsan kynsan ha nga mynnin ne mynta ka sngi, hynrei ka dei ka jingkylli kaba nga la kylli bad puson da ki bun bun snem mynta.
Tangba, ban poi sha kane ka thong ngi dei ban sngewthuh shuwa ia ki soh kiba mih na ki jinghikai shaphang ki sngi kiba khatduh bad ka jingrongnoh kaba ngi la ioh jinghikai baroh shi katta. Nga lah ban ong ba ki soh kiba mih na ki jinghikai shaphang ki sngi kiba khatduh bad ka jingrongnoh ki long, kiba pyrshah bad kiba khanglad ban pyndep ia ka hima U Blei ha kane ka pyrthei. Ngin dang iai bteng ban kren shuh shuh halor kane, ha ka bynta kaba ar.