Dawa ka JSU na ka MSPCB ban pynshai halor ka Wah Lukha

Jowai, 30 Naiwieng:
Ka Jaintia Students’ Union (JSU) Sengkmie haka jingpyllait khubor mynta ka sngi ka pynpaw iaka jingsngewkhia halor ka jingkylla rong Blue biang ka wah Lukha, kaba dei kawei na ki wah ba don nam hapoh ka Ri lum Jaintia bad kaba bsa ia bun tylli ki shnong kiba don ha baroh shi lynter jongka.
Namar ka jing kylla rong blue biang ka wah Lukha, ki nongialam jongka JSU Sengkmie bad ki nongialam jongka JSU Narpuh Circle kila ia kynduh mynta ka sngi hapoh ka ophis treikam jongka Seng ha Jowai ban ia pyrkhat sani bha bad wad iaki daw  halor kane ka jingiaikylla rong kane ka wah kaba la sdang naduh ki snem kiba la dep bad kaba iai bteng haduh mynta.Na ka liang ka JSU sengkmie, hadien bala bishar bniah naki katto katne ki jingwad jingtip kiba la wanrah daka JSU Narpuh Circle kala suba jur ba kane ka jingkylla rong jongka wah Lukha ka lah ban dei na ka daw jongki Kharkhana Dew Bilat kiba don ha kine ki thain, ym shuh kumba la kynnoh haki por bala dep ha kaba la kynnoh na ka daw jong u Dewiong.Ka JSU ka pynpaw ba ka jingkhangtih dewiong daka NGT mynta kala jan dap ar snem bad kaba lyngngoh pat ka long ba balei nalor ba la khang tih dewiong ka wah Lukha ka dang kylla rong blue? Nalor kata U slap lane ka umsaw kaba kit iaki jakhlia sha ka wah lukha ruh kala kut.Kumta halor kane ka nongrim, ka JSU ka dawa naka MSPCB ba kadei beit ban pynshai paidbah khamtam hadien ka jingleit jurip ka jongki haka 24 tarik mynta u bnai khnang ba ki paidbah kin shai bad tip iaka jingshisha baroh. Ha ka juh ka por ka JSU ka pynrem jur ruh iaka JHADC halor ka jingbym shimkhia halor kane ka wah namar ka JHADC ka nang tang ban lilam ia kane ka wah man la u snem katba ba ki lad ban iada iaka pat ka JHADC kam bna ei ei.