Shillong 17 Nohprah: Ki nongtrei muster roll ki ba hap hapoh ka shatri jong Ka All Jaintia Muster Roll workers and labour union mynta ka sngi ka 17 tarik u nohprah 2024 ka la wan hiar syndon sha Nongbah Shillong, ban sdang shong iakhih da kaba shah thngan ha madan malki khlem buhpor.
Hashwa kane nakaliang ki nongtrei muster roll ki ba don haduh da ki spah ngut, ki la sdang ka jingiaid kjat naduh madan jingkieng ha ryngkat ban rah da ki plakad ban dawa ia ha hok jongki na ka sorkar jylla.
Ka jingiakhih da kaba shong shah thngan khlem buhpor ki nongtrei muster roll kadei ha ka ba iadei bad ka jingsngap mynthi nakaliang ka sorkar jylla halor ka jingdawa jongki, ban pynkiew ïa ka jingsiew Variable Dearness Allowance ia kaba ka Sorkar ka la dei ban pynkiew naduh ka 1 tarik Risaw 2024, kumjuh ia ka Basic Floor Rate kaba dei ban kyntiew shisien san snem naduh ka 1 tarik Risaw 2023 katkum ka Minimum Wage Act 1958.
Ka jingiakren jongki nongtrei muster roll bad ka sorkar jylla ka la iaid mynta la palat 14 bnai, hynrei ka sorkar kam shem la ai kano kano ka jubab halor ka jingdawa jongki.
Ha ka jingiakren bad ka kong Wegetwell Rumuit general secretary katei ka kynhun ka la ong, ba ka jingdawa ka kynhun kalong, ba ka sorkar jylla kadei ban ai ia ka bhah nakabynta jongki kata ka basic Floor Rate ban ai iaki namar katkum ka ain ba ka sorkar kadei ban pyllait ha ka shisien sansnem.
Ka la ong ruh, ba nakaliang ka kynhun ka la ju leit man kapor ban pynkynmaw ia ka sorkar, ban pyntreikam noh ia ka jingdawa jongki.
Shuh shuh ka la ong, ba ki la ap naduh hynnin ka sngi ia ka hukum (order) namar ka sorkar ka la pynbna ba kan sa pyllait ia ka order hapoh ka 7 baje hynrei tad haduh mynta kim shym la pat ioh kano kano ka order kumta ki la shim kane ka sienjam ban iamih paidbah ha madan malki.
Kumta ki la pynpaw ruh, ba lada ka sorkar kam pat lah ban ai katkum ka jingdawa jongki kin nym sangeh ban shong iakhih tad haduh ba ka sorkar kan ai da ka order ki sa lah ban weng noh ia ki jingiakhih.
Phi don ban ong eiei?