Nongpoh, 17 Nohprah: Na ki saw ngut ki rangbah kiba la khlad hashen na ka jingjia ba kylla ka kali kit dieng ha surok khlaw ha Mynnar Jirang, lai ngut ki dei na ka shnong Iewsohksang bad uwei pat u dei na ka shnong Center Village Jirang.
Kitei kiba la khlad ki dei kiba la tip kum u Edward Nongkhlaw, Teilor Nongphlang bad u Francis Warjri, kiba dei na ka shnong Iewsohksang bad u Bankerlang Khyllait na ka shnong Center Village Jirang, katba uwei pat uba la lait im na katei ka jingjia, u dei uba la tip kum u Benedic Syiem.
Ka jingtip kaba la ioh lum, la ong ba katei ka trok ka la kylla ha ka por ba ka dang iaid ha ka surok khlaw ha Mynnar Jirang, kaba dei ruh ka por ba ki la thep dieng shi kali, na bynta ban pynpoi sha ki jaka ot dieng.
Shuh shuh, la ioh jingtip ruh ba ka rukom kylla katei ka trok kit dieng, ka la long kaba shyrkhei ei, namar katei ka trok ka la noh sha ka riat kaba don ia ka jingjylliew kumba 200 meter eiei bad haduh mynta ym pat lah ban tan ia katei ka trok.
Ia ka met jong kitei ki rangbah kiba la khlad noh na katei ka jingjia, la pynkit noh sha Nongpoh Civil Hospita, na ka bynta ban pyndep ia ki jingdonkam baroh bad mynta ka sngi, kiba haiing ki la wan ban shimti noh ia kitei ki metiap, katba ia uba la mynsaw jur ha katei ka jingjia, la pynkit noh sha ki jaka sumar ha Nongbah Shillong, na bynta ban ioh ia ka jingsumar kaba paka.
Haba iadei bad katei ka ka jingjia ba sngewsih, u Bah Sosthenes Sohtun, MLA Jirang, u la leit ban kynduh ia kiba haiing jong kiba la khlad bad nalorkata, u la pynkren ruh sha ki bor ba halor, na ka bynta ban pyndep kloi ia ki jingdonkam baroh, khnang ba kitei ki metiap kin poi noh sha ki iing ki sem bad ban pyndep ia ka lehniam leh rukom kaba khatduh.
Phi don ban ong eiei?