Ïaid paidbah ha Shillong, ba shah thombor ki Hindu ha Bangladesh

Shillong:Hapdeng ka jingkynad kaba mih hapdeng ka India bad Bangladesh, da ki spah ngut ki nong Shillong hapoh ka lama All Meghalaya Citizen Conscious Forum (AMCCF) ha ka sngi Thohdieng, ki la pynlong ïa ka jingïaid paidbah ha Shillong ban pynrem ïa ka jingshah thombor ki paid Hindu ha Bangladesh.

Kane ka jingïaid paidbah ka la sdang na lad Mawbah bad pynkut ha Rhino Point. Ki Nongïashimbynta ki la ïapyrta slogan ieid ri ba kynthup ïa ka “Bharat Mata ki Jai” ban pynpaw ïa ka jingïadon ryngkat bad ki ritpaid ha Bangladesh. U Paul ula pynrem jur ïa ki kam umsnam pyrshah ïa ki paid Hindu bad ban jur ïa ka jingdonkam ban leh eiei mardor ban ïada ïa ka hok bad ka jingshngaiñ jong kine ki rit paid ha Bangladesh.
U Raju Paul, Convenor ka Forum, ula pynbna ba ka Forum kan sa phah ïa ka dorkhas sha u Myntri Rangbah Duh ba shipor jong ka Ri Bangladesh lyngba ka Deputy Commissioner ka East Khasi Hills, kaba kdew ïa ki jingdawa ban pynkut noh ïa ki kam umsnam ha katei ka Ri ba markhap.

“Naduh ba khyllem ka Sorkar kaba jia ha u Nailar ha Bangladesh, ngi la ïohi ïa ka jingshah pynïap ba shyrkhei jong ki paid Hindu ba kynthup ruh ïa ki hynmen ki para kiba dei ki riewlum ba don ha Bangladesh, ki Khristan bad ki Buddhist. Kila mad ïa ka jingshah thombor ba shyrkhei ha ki riewthrang snam,” ula ong.
Kane ka jinghuri hura ha Bangladesh ka la sdang da ka jingïakhih ki samla pule pyrshah ïa ka jingbhah kam, kaba lam sha ka jingpynkhyllem ïa ka Sheikh Hasina na ka shuki Myntri Rangbah Duh ka Ri.

Hadien ba ka Hasina ka la phet napoh ka Ri, ka jingthombor ïa ki rit paid ha kane ka ri kam shym la sangeh satia watla shibun ki jingdawa kila mih na ki kynhun bapher bapher ban pynkut ïa ki kam thombor. Namar ka jingïai bteng ki kam umsnam khamtam pyrshah ïa ki Hindu, ka jingïadei hapdeng ka India bad ka Bangladesh ka la sdang ban mih jingthut.