Weng ki MDC Congress na ka EC ba ïalam ka NPP ha KHADC

Shillong:Hadien kumba 3 bnai duna ba ki MDC ki la shah pynbor ha ki nongkyrshan bad nongialam jong ka seng Congress, mynhynnin ka janmiet Sngi Thohdieng ki MDC ka seng Congress ki la pynbna ba la weng bad ban ym don bynta shuh ha ka executive committee ba ïalam da ka NPP ha KHADC ka kynhun synrop Khasi Hills Democratic Forum (KHDF).

Ka jingdon ki MDC ka Congress ha KHADC ka la kiew sha ka 3 ngut hadien ka jingleit pynïasoh sa MDC ka Jirang, Bah Victor Ranee nalor ki ar ngut kiba la don lypa, u Bah Ronnie V Lyngdoh bad u Deputy CEM, Bah Pynshngaiñ N Syiem.
U Bah PN Syiem u la iathuh ruh ba u la phah ia ka shithi ieh noh kam kum u Deputy CEM sha u CEM ka KHADC.
Haba pyntip halor kane, u bah Pynshngain N Syiem bad u bah Ronnie V Lyngdoh kila pynbna ba kila rai ban weng noh ia ka jingkyrshan ia ka Executive Committee kaba ialam ka NPP hapoh ka jingialam u bah Pyniaid Sing Syiem kum u CEM naduh mynta ka sngi.

Kane ka rai jongki ban weng ia ka jingkyrshan ka dei hadien ba ka party kam sngew tynnad ban iatreilang bad ka NPP namar ba ka iadon lang bad ka BJP ha ka sorkar jylla.
Lah ban kdew ba kane ka rai ka Congress ka long shwa ka dorbar tlang ka Council ka ban long ha ka 19 bad 20 tarik mynta u bnai.