Pynthikna u Bah Prestone Tynsong, ban sdang noh shen ka jingpyntrei ia ka surok Nongpoh-Umden-Sunapur

Nongpoh, 10 Nohprah: U Bah Prestone Tynsong, Symbud Myntri Rangbah ka jylla bad uba dei peit ia ka tnat ki kam pynbha surok, mynta ka sngi u la leit ban buh Mawnongrim, na ka bynta ban pyntrei noh shen ia ka surok kaba pyniasoh na Nongpoh sha Umden, kaba don ia ka jingjrong kumba 20km bad kaba la ioh ia ka jingpynmang tyngka kaba T. 49. 53 klur.
Nalor katei ka jingleit buh Mawnongrim da u Bah Prestone Tynsong, hynrei kaba la pynkmen eh ia ki paidbah ha ka thain Umden hi baroh kawei, ka long hadien ba ka sorkar ka la pynbna ba kan sa shna noh ia ka surok na Umden sha Sunapur, kaba don ia ka jingjngai kumba 38km, kan sa sdang noh shen lyngba ka skim PMGSY, kaba la pynmang tyngkata haduh T. 47.20 klur. 
Ka surok na Nongpoh-Umden shaduh Sunapur, ka dei ka surok kaba la tip kum ka NUS Road, kaba dei ruh kawei na ki surok ba donkam eh ha Ri Bhoi, namar ba ka dei ka surok kaba pyniasoh sha ka jylla Assam, hynrei ka dei ruh ka surok kaba la pyndonkam da ki paidbah, kiba shong ba sah ha ki spah tylli ki shnong, la ka long ha ki paidbah kiba sah ha Meghalaya bad kiba sah ha Assam ruh kumjuh.
Ha katei ka sngi, ba la buh Mawnongrim ha Umden,  la sakhi da ka jingdon u Bah Mayralborn Syiem, MLA Nongpoh, u Dr Celestine Lyngdoh, MLA Umsning, u Bah Balajied Rani, MDC Nongpoh, ki heh ophisar ka tnad PWD Roads bad Building ka jylla, ki bor pyniaid District ka Ri Bhoi nalor kiwei kiwei de ki ‘riew rangbah bad ki paidbah nongshong shnong ka thain.
Haba kren ha katei ka sngi, u Bah Prestone Tynsong, u la ong ba kane ka sorkar kaba mynta, ka la ialeh shitom na bynta ban wanrah ia ka roi ka par hapoh ka jylla hi baroh kawei bad khamtam lei haba iadei bad ki lynti synkien ne ki surok, ha kaba kumba ka long mynta, la jan baroh ki dong ki thain, ki la ioh ia ki surok kiba bit ba biang, watla katta ki dang don ki katto katne ki jaka, ba ki paidbah ki dang shem jingeh ha ka leit ka wan, ia kaba ka sorkar ka la dep tip bad shen kiba kum kita ki jaka, kin sa ioh ia ki surok kiba bit ba biang.
Halor ka surok na Nongpoh-Umden-Sunapur, u Bah Prestone Tynsong, u la ong ba ka jingpyntrei ia katei ka surok kan sdang noh shen bad la kumno kumno kan sdang noh ha u bnai ba nyngkong jong u snem 2025.