Lada slem kam don jingmut shuh ka elekshon MDC

Shillong, 29 Naiwieng:
U Chairman ka KHADC u Bah Man sturdy Nongrem u la ong ba ka elekshon shiteng samoi sha ka KHADC dei ban  pynlong kloi namar ba kito ki jaka bym don ki nongmihkhmat MDC kin shah ktah bha shano kin leit.
“Lada ka sorkar kan pynlong elekshon slem haduh 6 bnai ne shi snem kam don jingmut shuh. Nga sngew ba ka elekshon shiteng samoi ha kito ki jaka ba lait dei ban pynlong kloi”, la ong u Bah Nongrem haba iakren ha kane ka sngi Saitjain bad u Rupang.U la ong ba ka long kaba shisha ba ka shong ha ka sorkar jylla ba kan shim ia ka rai lano kan pynlong ia ka elekshon namar ba kam don ka ain ne ka kyndon kaba kren shai ba ia ka elekshon shiteng samoi dei ban pynlong ha kano kano ka por.
“Watla kam don ain kaba ong ban pynlong elekshon ha kano kano por kumba long ia ki MLA hynrei lada pynlong slem kan long ka jingeh ia ki paidbah kiba khlem don MDC bad kan ktah ia ka jingtreikam ka Council namar ba ka shuki MDC kaba lait ka la bun”, la ong u Bah Nongrem. Kumba ia ka MLA, haba don kano kano ka jingiehkam ne khlad u MLA, ka Election Commission kan hap ban pynlong noh ia ka elekshon hapoh hynriew bnai hynrei ha ka elekshon MDC kam don satia ka ain kaba ong kumta.
Hynniew tylli ka shuki MDC ka la lait kawei ha JHADC bad hynriew tylli ha KHADC hadien ba ki MDC kiba long MLA ha kajuh ka por, ki la iehnoh namar ka jingtieng ioh khyrwait ka ain.
Kham mynshwa, u Commissioner & Secretary ka tnad District Council Affairs (DCA) u Bah Jopthiaw Lyngdoh u la ong ba ka jingpynlong ia ka elekshon shiteng samoi jong ki district council ha ka jylla kan shong ha ka sorkar jylla ba kan rai bad kam don ka ain kaba kren ba dei ban pynlong ha kano kano ka por.
Haba iakren bad u Rupang, u Bah Lyngdoh u la ong, “Ka shong ha ka sorkar jylla ba kan rai ban pynlong ia ka elekshon shiteng samoi”,.
Ki hynriew ngut kiba iehnoh kam MDC ki long Bah HDR Lyngdoh na Sohiong, Bah Ardent M Basaiawmoit na Nongkrem, Bah Sanbor Shullai na Laban, Bah Brolding Nongsiej na Mawthadraishan, Bah Metbah Lyngdoh na Mairang, Bah K Plasting Pangiang na Rambrai-Jyrngam bad u Bah Stephanson Mukhim na Amlarem ka JHADC.Katba u Bah Pynshngain N Syiem uba long ruh u CEM nalor ba u long MLA/MDC na Mawsynram u la kyntait ban iehnoh ia ka kam bad u la rai ban iakhun pyrshah ia kane ka ain ha ka iing ka kashai. Haduh mynta u khlem iehnoh ia kano kano ka kam kum u MDC/MLA.