“U Mradkhlaw: u syiem ba phra!”

AIS Suja

U Mradkhlaw u syiem ba phra. Jingpynpaw 17:11, un leit shong ha kata ka Temple kaba lai ha Jerusalem un leh ialade kum u Blei. 2 Thessoloni 2:3-4. Tang shu shong hapoh ka Temple kaba Lai ha Jerusalem, un sdang ban phah pyniap ia ki Jiw ne Israel haduh ar bynrta, te kan jia ha ka ri baroh, ong u Trai, ba AR BYNTA ha ka kin duh noh bad kin IAP NOH, hynrei shi bynta yn pynsah” Sekharaiah 13:8. Ha kata ka por u Blei un buhrieh ia ki 1,44,000 ngut ki Israel ha Edom kumba 1260 sngi ne 3 snem shiteng. Bad kata ka briew (ki 1,44,000 ngut ki Israel) ka la phet iap sha ri khlaw ha kaba don ka jaka (ka Edom) ia kaba la khreh da u Blei, khnang ba hangta kin ioh bsa ia ka 1260 sngi” Daniel 11:41 / Jingpynpaw 12:6-16.

Ha kata ka por, “Un rung hapoh kata ka ri Badon burom ruh bad bun ki ri yn pynkyllon hynrei kine (1,44,000 ngut) yn pyllait na ka kti jong u (Mradkhlaw), ka Edom, bad ka Moab, bad ki rangbah na ki khun u Ammon” (ki pateng jong u Lot). Daniel 11:41. Ha kata ka por une u Mradkhlaw un dawa ba dei ban mane ia u, hapoh kata ka por jong ki 42 bnai ne 1260 sngi. Ka ktien u Blei ka ong kumne: Bad nga la iohi ia uwei pat u Mradkhlaw uba kiew noh na kata ka khyndew bad u la don ar tylli ki reng ba ia syriem kum u khun langbrot bad u la kren kum u Iakjakor. Bad ia kata ka bor synshar baroh ka jong uta u Mradkhlaw ba nyngkong u leh ha khmat jong u bad u pynbor ia kata ka khyndew kiba shong ha ka ba kin mane ia u Mradkhlaw ba nyngkong ia uba la pynkhiah ia kata ka jingmong iap jong u ……. u da ong ha kita kiba shong halor kata ka khyndew ba kin ia thaw dur (statue) ia uta u Mradkhlaw uba la ioh ia kata ka jingmong da ka waitlam bad uba la ioh im pynban. La ai ha u ka mynsiem (ha ka dur statue) uta u Mradkhlaw ba kata ka dur uta u Mradkhlaw kan ioh kren ruh ba kat kiba ym mane dem ia kata ka dur (statue), yn pyniap noh ia ki” Jingpynpaw 13: 11-18.

Ha kane ka por kein yn pynsangeh ia ki Jiw na ka jinglehniam ai jingknia kaba da ki mrad ha kata ka Temple, un pynbor ia ki Jiw ba kin mane dem ia u. Hynrei kaei kaba jia? ki Jiw kin ym treh ban mane ia kata ka dur (statue) namar ki mane tang ia u Blei ki Israel kein. Dei ha kane ka por ba ki Jiw kin kyntait bad u Mradkhlaw un phah pyniap kham bun kham palat ki Israel ban ia kaba mynshwa ha ki snem 1939-1945 AD. Dei ha kane ka por ki Jiw kin sngewthuh ba pleng uta uba wan ban shong ha kata ka Temple jong ki u dei u nongshun ba khraw tam jong ki Jiw.

Ym tang ia ki Jiw, hynrei yn pyllong ia baroh (baroh ka pyrthei) ia kiba rit baria, kiba khraw batri, kiba riewspah kiba duk, kiba laitluid bad ki mraw ba yn buh ha ki IA KA DAK HALOR KA KTI KAMON JONG KI, LANE HALORKI SHYLLANGMAT JONG KI, BA UNO UNO UN NYM LAH THIED NE DIE, HYNREI TANG UTA UBA DON KA DAK JONG KATA KA KYRTENG UTA U MRADKHLAW KEIN, KATA KA JINGKHEIN KATA KA KYRTENFG JONG U – 666. Jingpynpaw 13:11-18.
Kaei ka ban jia hapoh kata ka por jong ka Hukum u Mradkhlaw? Un wan mih u angel kein- “Bad u angel uba Lai uba bud ia ki u da ong ia kata ka ktien bajam: lada uno uno ruh u mane dem ia uta u Mradkhlaw bad ia ka dur (statue) jong u, bad u pdiang ia kata ka DAK halor ka shyllangmat jong u lane halor ka kti jong u, uta ruh un dih na ka wain ka jingbitar u Blei, ia kaba la khreh khlem da pynkhleh ha kata ka khuri ka jingot shla jong u, bad yn pynkordit ia u DA KA DING BAD U KYNDOK ha khmat kita ki angel bakhuid bad hakhmat uta u khun langbrot. Te ka tdem kata ka jingkordit ka kiew noh sha ki bymjukut ki bymjukut bad kim ioh ia ka ban shongthait mynsngi bad mynmiet KIBA IA MANE DEM IA UTA U MRADKHLAW BAD IA KA DUR JONG U, bad jar uba pdiang ia kata ka DAK ka kyrteng 666 jong u” Jingpynpaw 14:9-11.

Kumta ha kata ka por kein 2 bynta ki Israel kin shah pyniap ha ki kti u Mradkhlaw uba Phra uba la ju long uba Hynniew. Sekharaiah 13:8 / Jingpynpaw 17:11. Kaei kaba ngi dei ban tip hangne ka long, ba uta u Mradkhlaw uba la ju long um long shuh, bad ba u long, u dei uta kein u Mradkhlaw uba 7, u ban sa long ruh ma u hi uba 8. Jingpynpaw 17:11. Dei une ujuh u ban sa shong ha kata ka Temple Balai ha Jerusalem, un leh ialade kum u Blei, hynrei u dei u nongshun bakhraw tam ki Israel bad ia ka pyrthei hi baroh kawei. Hynrei ym baroh na ki Israel ki ban shah pyniap, hynrei ki don shi bynta ia kiba u Blei u la ri kyndong, kita 1,44,000 ngut kein kiba long ki 12 jait ki khun Israel, 12000 ngut na kawei kawei ka jait Israel. Jingpynpaw 12:6-16.
Ha shwa kine kiei kiei baroh, kan don ka jingmihpat bad ka jingrongnoh ia ki riewkhuid kiba dang im bad kiba la iap kumjuh. Thessoloni 4:15-18.
Kumta, hapoh ka por ka jingsynshar u Mradkhlaw, uta u syiem uba phra uba pynmih ka hukum ban pyniap ia ki Jiw, ha kata ka por un wan mih u angel uba her ha suin bneng uba ialap hapdeng ki Jiw. “Nga la iohi ia uwei pat u angel uba her hapdeng ka bneng (ha suin) uba don ka Gospel bymjukut ban pynbna ha kita kiba shong halor ka khyndew bad ha ki kynja bynriew, ki jaidbynriew ki thylliej bad u paidlang baroh; ba u ong da ka ktien bajam – TO SHEPTIENG IA U BLEI TO AI KA BUROM HA U NABA LA WAN KA POR JINGBISHAR JONG U, BAD TO PHIN MANE DEM IA UTA UBA LA THAW IA KA BNENG KA KHYNDEW BAD IA KA DURIAW BAD IA KI PUKRI UM” Jingpynpaw 14:6-7.

Lehse ki nongpule baieit ki la kham shai khyndiat halor u Mradkhlaw u ban sa long u Syiem uba Phra, ha ki por ban sa wan. “Namar kata ka ia ka la jan” Jingpynpaw 1:3.