Nga sah marwei ha TMC, ong u bah Charles Pyngrope

Shillong:U MLA ka TMC ka Nongthymmai u bah Charles Pyngrope ula ong ba kumba long mynta u sah marwei ha TMC ha Nongthymmai konstitwensi hadien ba ki nongialam ki la mih ban iasoh sha ka Congress.

Haba kren mynta ka sngi, u bah Charles ula ong ba kumba long mynta u don bad u dei u MLA ka TMC, bad um lah ban bat ne ban hukum ia kiwei namar ba ma u ruh u dei tang kumba long lem kiwei.
“Kumba long mynta nga sah marwei, nga dei u shipai marwei”, la ong u bah Charles bad bynrap, “Ngam lah ban bat ia kiwei haba ki kwah ban mih”.
Halor ka jingkylli ban iasoh biang sha ka Congress kaba ula phet, ula ong ba ka Congress ka dei ban iaid katkum ki kyndon haba ka jied ia ki nongkitkam.

“Ka Congress ka dei ka seng kaba rim tam ha India bad ka donkam ban bud ia ki kyndon rukom pyniaid kam ka party haba jied ia ki nongkitkam”, la ong u bah Charles.
Halor ka jingkylli ba un leit iasoh biang ne em sha ka Congress, u bah Charles ula ong ba u dei u MLA ka TMC bad ula pynkynmaw ia ka jingkren u bah Patty Riple Kyndiah, bam kwai ha u duwar u Blei, “u Charles u dei u shipai marwei”.

Lah ban kdew ba u bah Charles lem bad u Dr. Mukul Sangma bad kiwei ki la mih noh na ka Congress bad leit iasoh sha ka TMC hadien ba kila kynnoh ba ka AICC ka la shu thung ia u bah Vincent H Pala kum u President ka MPCC khlem kano kano ka jingiathep vote.